കേരളത്തിന് വിദേശസഹായം: ഇടപെടാനാകില്ലെന്ന് സുപ്രീം കോടതി

ന്യൂഡൽഹി: കേരളത്തിന് വേണ്ടി വിദേശ സഹായം സ്വീകരിക്കാൻ കേന്ദ്രത്തോട് പറയാൻ കഴിയില്ലെന്ന് സുപ്രീം കോടതി. ഈ വിഷയത്തിൽ അടിയന്തരമായി വാദം കേൾക്കണമെന്ന ആവശ്യം ചീഫ് ജസ്റ്റിസ് ദീപക് മിശ്ര അധ്യക്ഷനായ ബെഞ്ച് തള്ളി. പ്രളയക്കെടുതിയിൽ അകപ്പെട്ട കേരളത്തിന് വിദേശ സഹായം നിരസിച്ചു കൊണ്ടുള്ള കേന്ദ്ര നിലപാടിൽ ഇടപെടണമെന്ന് ആവശ്യപ്പെട്ട് അഭിഭാഷകനായ ജയ് സൂക്കിനാണ് ഹർജി സമർപ്പിച്ചത്.

എന്നാൽ, സർക്കാരിന്റെ നയങ്ങളിൽ സുപ്രീം കോടതിക്ക് എങ്ങനെ ഇടപെടാനാകുമെന്ന് ചീഫ് ജസ്റ്റിസ് ദീപക് മിശ്ര ചോദിച്ചു. അതെ സമയം, കേരളത്തിന്റെ ആവശ്യങ്ങൾ മാനിച്ച് കേന്ദ്രാവിഷ്‌കൃത പദ്ധതികളിൽ ആവശ്യമായ മാറ്റങ്ങൾ വരുത്തുന്നത് പരിഗണിക്കാമെന്ന് സുപ്രീം കോടതി അറിയിച്ചു. പ്രധാനമന്ത്രി ആവാസ് യോജന വഴി പരമാവധി വീടുകൾ നൽകുമെന്ന് കേന്ദ്ര ഗ്രാമവികസന വകുപ്പ് മന്ത്രി നരേന്ദ്രസിങ് തോമർ അറിയിച്ചു.

കേരളത്തിൽ നിന്നുള്ള എംപിമാരുമായുള്ള ചർച്ചയിലാണ് മന്ത്രി ഇക്കാര്യം അറിയിച്ചത്.വിദേശ സഹായം സ്വീകരിക്കുന്നതിനുള്ള തടസം നീക്കണമെന്ന് കേന്ദ്ര മന്ത്രിമാരോട് ആവശ്യപ്പെടുമെന്ന് കെ.സി.വേണുഗോപാൽ പറഞ്ഞു. ഇതേ ആവശ്യം ഉന്നയിച്ച് പ്രധാനമന്ത്രി നരേന്ദ്ര മോദിയുമായും കൂടിക്കാഴ്‌ച നടത്തുമെന്ന് എംപി അറിയിച്ചു.