ലാവ്‍ലിൻ കേസ്: ഹർജി സുപ്രീംകോടതി ഇന്ന് പരിഗണിക്കും

ന്യൂഡൽഹി: എസ്എൻസി ലാവ്‍ലിൻ കേസിൽ പ്രതികൾ സമർപ്പിച്ച ഹർജി സുപ്രീം കോടതി ഇന്ന് പരിഗണിക്കും. ഹൈക്കോടതി വിധിക്കെതിരെയാണ് ഹർജി സമർപ്പിച്ചിരിക്കുന്നത്. കെഎസ്ഇബി മുന്‍ ഉദ്യോഗസ്ഥരായ കസ്തൂരിരംഗ അയ്യരും, ആര്‍.ശിവദാസും ഒരുമാസത്തേക്ക് കേസ് മാറ്റണമെന്ന് ആവശ്യപ്പെട്ടാണ് ഹർജി നൽകിയിരിക്കുന്നത്.

രേഖകള്‍ സമര്‍പ്പിക്കാന്‍ നാലാഴ്ചത്തെ സമയം വേണം എന്നാവശ്യപ്പെട്ടാണ് കസ്തൂരിരംഗ അയ്യര്‍ അപേക്ഷ നല്‍കിയത്. വ്യക്തിപരമായ അസൗകര്യം ചൂണ്ടിക്കാട്ടിയാണ് കെ എസ് ഇ ബി മുന്‍ ചെയര്‍മാന്‍ ആര്‍ ശിവദാസൻ അപേക്ഷ നൽകിയിരിക്കുന്നത്.

അതേ സമയം മുഖ്യമന്ത്രി പിണറായി വിജയന്‍ അടക്കം മൂന്നുപേരെ കുറ്റവിമുക്തരാക്കിയ ഹൈക്കോടതി വിധിക്കെതിരെ സിബിഎെ ഇത് വരെ അപ്പീൽ ഫയൽ ചെയ്തിട്ടില്ല.