ന്യൂഡൽഹി: നിയമസഭാ കയ്യാങ്കളി കേസിൽ കേരളത്തിന്റെ ഹർജിയിൽ നാളെ സുപ്രീംകോടതി വിധി പറയും. വിദ്യാഭ്യാസ വകുപ്പ് മന്ത്രി വി ശിവൻകുട്ടി അടക്കമുളള്ള ആറ് പ്രതികൾക്കെതിരെയുള്ള കേസ് പിൻവലിക്കണം എന്ന ഹർജിയിലാണ് സുപ്രീംകോടതി വിധി പറയുക. രാവിലെ 10.30 നാണ് വിധി പറയുക, മാതൃഭൂമി റിപ്പോർട്ട് ചെയ്തു.
വി ശിവൻകുട്ടി, കെടി ജലീൽ, ഇപി ജയരാജൻ, കുഞ്ഞുമുഹമ്മദ് മാസ്റ്റർ, സികെ സദാശിവൻ, കെ അജിത് എന്നീ പ്രതികൾ വിചാരണ നേരിടണമെന്നുള്ള ഹൈക്കോടതി വിധിക്കെതിരെയാണ് സംസ്ഥാന സർക്കാർ സുപ്രീംകോടതിയെ സമീപിച്ചത്. നിയമസഭയ്ക്കുള്ളിൽ നടക്കുന്ന കാര്യങ്ങളിൽ അംഗങ്ങൾക്ക് പ്രത്യേക പരിരക്ഷയുണ്ടെന്നാണ് കേരളത്തിന്റെ വാദം.
ജസ്റ്റിസ് ഡിവൈ ചന്ദ്രചൂഢ്, എം ആർ ഷാ എന്നിവർ അടങ്ങുന്ന ബെഞ്ചാണ് കേസ് പരിഗണിക്കുക. പ്രതികളായ ജനപ്രതിനിധികൾ വിചാരണ നേരിടേണ്ടതാണെന്ന് കേസ് പരിഗണിക്കവെ കോടതി വ്യക്തമാക്കിയിരുന്നു.