കേരള ദുരിതാശ്വാസ നിധിയിലേക്ക് സൂര്യയുടെയും കാര്‍ത്തിയുടെയും വക 25 ലക്ഷം

തിരുവനന്തപുരം: സംസ്ഥാനത്തെ മഴക്കെടുതിയില്‍ ദുരിതമനുഭവിക്കുന്നവര്‍ക്ക് സഹായമായി കോളിവുഡ് സഹോദര താരങ്ങളും രംഗത്ത്. തമിഴ് സൂപ്പര്‍ താരങ്ങളായ കാര്‍ത്തിയും സൂര്യയും 25 ലക്ഷമാണ് കേരളത്തിൻ്റെ ദുരിതാശ്വാസ നിധിയിലേക്ക് സംഭാവന ചെയ്തിരിക്കുന്നത്. മലയാള സിനിമാ രംഗത്ത് നിന്ന് മമ്മൂട്ടി സഹായവാഗ്ദാനവുമായി ആദ്യം രംഗത്തെത്തിയിരുന്നു. കൊച്ചിയിലെ ദുരിതാശ്വാസ ക്യാമ്പിലെത്തിയായിരുന്നു താരത്തിൻ്റെ സഹായ ധന വാഗ്ദാനം.

മലയാള താരസംഘടനയായ എഎംഎംഎ പത്ത് ലക്ഷം രൂപയും ദുരിതാശ്വാസ നിധിയിലേക്ക് സംഭാവന നൽകിയിട്ടുണ്ട്. നടൻ ജഗദീഷും മുകേഷും ചേര്‍ന്ന് തുക മുഖ്യമന്ത്രിക്ക് കൈമാറി. എന്നാല്‍ ഇതിനെ വിമര്‍ശിച്ച് നിരവധിപ്പേരാണ് സമൂഹ മാധ്യമങ്ങളിലൂടെ രംഗത്തെത്തിയിരിക്കുന്നത്. തമിഴ് നടന്മാരായ സൂര്യയും കാര്‍ത്തിയും ചേര്‍ന്ന് 25 ലക്ഷം നല്‍കിയപ്പോള്‍ കോടികള്‍ പ്രതിഫലം വാങ്ങുന്ന സൂപ്പര്‍ താരങ്ങളടക്കമുള്ള 480 ഓളം അംഗങ്ങളുള്ള താരസംഘടന ദുരിതാശ്വാസ നിധിയിലേക്ക് നല്‍കിയ തുക കുറഞ്ഞു പോയെന്നതാണ് പരക്കെയുള്ള ആക്ഷേപം.



നടി ആക്രമിക്കപ്പെട്ട കേസില്‍ സംഘടനയ്ക്കുണ്ടായ കളങ്കം മറയ്ക്കാനാണ് സഹായവുമായി എത്തിയതെന്നാണ് ചിലരുടെ പക്ഷം. അധ്യാപക സംഘടനയായ KSTA ഒറ്റ ദിവസത്തെ കളക്ഷനില്‍ നല്‍കിയത് 24 ലക്ഷം രൂപയാണെന്നും ഒരാള്‍ വ്യക്തമാക്കി. കൂടാതെ പല മാധ്യമസ്ഥാപനങ്ങളും ഐടി കമ്പനികളും അടക്കം ജീവനക്കാരുടെ ഒരു ദിവസത്തെ വേതനം ദുരിതാശ്വാസ നിധിയിലേക്ക് സംഭാവന ചെയ്യുന്നുമുണ്ട്.