അടുത്ത തെരഞ്ഞെടുപ്പിൽ മത്സരിക്കാനില്ലെന്ന് സുഷമാ സ്വരാജ്

ഭോപ്പാൽ: അടുത്ത ലോക്സഭാ തെരഞ്ഞെടുപ്പിൽ മത്സരിക്കാനില്ലെന്ന് വിദേശകാര്യമന്ത്രി സുഷമാ സ്വരാജ്. മധ്യപ്രദേശിൽ തെരഞ്ഞെടുപ്പ് പ്രചാരണത്തിനിടെ മാധ്യമങ്ങളോട് സംസാരിക്കുകയായിരുന്നു സുഷമ.

ആരോഗ്യകാരണങ്ങള്‍ മുൻനിര്‍ത്തിയാണ് സുഷമാ സ്വരാജ് മത്സരത്തിൽ നിന്ന് പിൻമാറിയതെന്നാണ് സൂചന. തന്‍റെ തീരുമാനം അടുത്ത തെരഞ്ഞെടുപ്പിൽ മത്സരിക്കേണ്ടെന്നാണെന്നും എന്നാൽ പാര്‍ട്ടിയാണ് ഇക്കാര്യം തീരുമാനിക്കേണ്ടതെന്നും സുഷമാ സ്വരാജ് പറഞ്ഞു.

നിലവിൽ മധ്യപ്രദേശിലെ വിദിശ ലോക്സഭാ മണ്ഡലത്തെ പ്രതിനിധീകരിക്കുന്ന പാര്‍ലമെന്‍റ് അംഗമാണ് സുഷമ.