സിന്തൈറ്റിലെ തൊഴിലാളി യൂണിയന്‍ സമരം തുടരുന്നു

കൊച്ചി: കോലഞ്ചേരിയിലെ സിന്തൈറ്റ് കമ്പനിയില്‍ സമരം തുടര്‍ന്ന് ഇടതുപക്ഷ തൊഴിലാളി യൂണിയന്‍, സിഐടിയു. തുടര്‍ച്ചയായ രണ്ടാം ദിവസവും ജോലിക്കെത്തിയ തൊഴിലാളികളെ സിഐടിയു പ്രവര്‍ത്തകര്‍ തട‍ഞ്ഞു.

സി‌ഐ‌ടിയു ഉപരോധത്തെ തുടര്‍ന്ന് പത്ത് ദിവസമായി സിന്തൈറ്റ് അടച്ചിട്ടിരിക്കുകയായിരുന്നു. തൊഴിലാളികളെ സ്ഥലം മാറ്റിയതിനെ തുടര്‍ന്ന് ഉണ്ടായ തര്‍ക്കമാണ് ഇപ്പോഴത്തെ സമരത്തിന് കാരണം.

കമ്പനി അനുകൂല തൊഴിലാളികള്‍ ഇന്ന് രാവിലെ ഫാക്റ്ററിയിലേക്ക് എത്തിയപ്പോള്‍ സിഐടിയു പ്രവര്‍ത്തകര്‍ തടഞ്ഞു. പോലീസ് സംരക്ഷണത്തിലാണ് ജീവനക്കാര്‍ എത്തിയത്. സിഐടിയു പ്രവര്‍ത്തകര്‍ സംഘടിച്ചതോടെ നൂറോളം വരുന്ന സിന്തൈറ്റ് ജീവനക്കാര്‍ ഫാക്റ്ററിക്ക് പുറത്തുള്ള കോര്‍പറേറ്റ് ഓഫീസിലേക്ക് പോയി.

പതിനെട്ട് തൊഴിലാളികളെയാണ് സിന്തൈറ്റ്, കോയമ്പത്തൂരിലെക്ക് സ്ഥലം മാറ്റിയത്. ഇവരെ തിരിച്ചുകൊണ്ടു വരുന്നതുവരെ സമരം തുടരുമെന്നാണ് ഇടത് തൊഴിലാളി യൂണിയന്‍ നിലപാട്. സിന്തൈറ്റ് മാനേജ്‍െമന്‍റിന്‍റെ പ്രതികാര നടപടിയാണ് പ്രശനങ്ങള്‍ക്ക് കാരണമെന്ന് മുഖ്യമന്ത്രി പിണറായി വിജയന്‍ കഴിഞ്ഞ ദിവസം നിയമസഭയില്‍ പറഞ്ഞിരുന്നു.