തിരുവനന്തപുരത്ത് ചൊവ്വാഴ്ച മുതല്‍ ഓട്ടോ ടാക്സി പണിമുടക്ക്

തിരുവനന്തപുരം: തലസ്ഥാനത്ത് ചൊവ്വാഴ്ച മുതല്‍ ഓട്ടോ ടാക്സി പണിമുടക്ക്. തൊഴിലാളികൾ ഉന്നയിക്കുന്ന വിവിധ ആവശ്യങ്ങൾ നിശ്ചിത സമയത്തിനുള്ളിലും അംഗീകരിക്കാത്തതിനാലാണ് അനിശ്ചിത കാല പണിമുടക്കിന് ആഹ്വാനം ചെയ്തിരിക്കുന്നത്. ഓട്ടോറിക്ഷ, ടാക്സി, ലൈറ്റ് മോട്ടോര്‍ വാഹന തൊഴിലാളികൾ സംയുക്തമായാണ് അനിശ്ചിത കാല പണിമുടക്ക് നടത്തുക.

ആലപ്പുഴയിലും സ്വകാര്യ ബസ് ജീവനക്കാര്‍ ഇതേ ആവശ്യങ്ങള്‍ ഉന്നയിച്ച്‌ പണിമുടക്ക് നടത്തുമെന്ന് അറിയിച്ചിരുന്നു. ഈ പണിമുടക്കിന് സിഐടിയു, എഐടിയുസി, ഐഎന്‍ടിയുസി, എച്ച്‌ എംഎസ്, ടിയുസിഐ, യുടിയുസി, ജെടിയു എന്നീ തൊഴിലാളി സംഘടനകളുടെ പിന്തുണയുണ്ട്.

ക്ഷേമനിധിയില്‍ മുഴുവന്‍ തൊഴിലാളികളെയും ഉള്‍പ്പെടുത്തുക, ടാക്സികള്‍ക്കുള്ള 15 വര്‍ഷ മുന്‍‌കൂര്‍ ടാക്സ് ഒഴിവാക്കുക എന്നിവയാണ് തൊഴിലാളികള്‍ ഉന്നയിച്ച പ്രധാന ആവശ്യങ്ങള്‍. പണിമുടക്കില്‍ ഏകദേശം എട്ടുലക്ഷത്തിലേറെ തൊഴിലാളികള്‍ പങ്കുചേരും എന്ന് യൂണിയനുകള്‍ അറിയിച്ചു.