ഇനി 10 നാള്‍ ശബരിമലയില്‍ ഉത്സവക്കാലം, പൈങ്കുനി മഹോത്സവത്തിന് ഇന്ന് കൊടിയേറ്റ്; 25 ന് പമ്പയില്‍ തിരു ആറാട്ട്

ശബരിമല: പൈങ്കുനി ഉത്രം മഹോത്സവത്തിന് ശബരിമല ശ്രീ ധര്‍മ്മശാസ്താ ക്ഷേത്രത്തില്‍ ഇന്ന് കൊടിയേറ്റ്. ഇനി 10 നാള്‍ സന്നിധാനത്ത് ഉത്സവക്കാലം. രാവിലെ 8.30 നും ഒമ്പതു മണിക്കും മധ്യേയുള്ള മുഹൂര്‍ത്തത്തിലാണ് കൊടിയേറ്റ്.Also Read: 'എന്റെ പ്രിയപ്പെട്ട കുടുംബാഗങ്ങളെ'; കേന്ദ്രസർക്കാരിന്റെ നേട്ടങ്ങൾ എണ്ണിപ്പറഞ്ഞ് പൗരന്മാർക്ക് പ്രധാനമന്ത്രിയുടെ തുറന്ന കത്ത്

ഉത്സവ ദിവസങ്ങളില്‍ ഉത്സവബലി, ഉത്സവബലിദര്‍ശനം, ആനപ്പുറത്ത് എഴുന്നള്ളിപ്പ് എന്നിവ ഉണ്ടാകും. 24 ന് രാത്രിയാണ് പള്ളിവേട്ട. ശരം കുത്തിയിലാണ് പള്ളിവേട്ട നടക്കുക. 25ന് രാവിലെ ഒന്‍പത് മണിക്ക് ആറാട്ട് പുറപ്പാട്. ഉച്ചക്ക് 11.30 മണിയോടെ പമ്പയില്‍ തിരു ആറാട്ട് നടക്കും.അന്ന് രാത്രി കൊടിയിറക്കി മറ്റ് പൂജകള്‍ പൂര്‍ത്തിയാക്കി ശ്രീകോവില്‍ നട അടക്കും. ഉത്സവത്തോടനുബന്ധിച്ച് ശബരിമല സന്നിധാനത്തെ സ്‌റ്റേജില്‍ വിവിധ കലാപരിപാടികളും അരങ്ങേറും.


മീനമാസ പൂജകള്‍ക്കും ഉത്സവത്തിനുമായും മാര്‍ച്ച് 13 നാണ് ശബരിമല നട തുറന്നത്. 13 ന് തുറന്ന നട തുടർച്ചയായി 13 ദിവസം നടതുറന്നിരിക്കും. വെർച്വൽ ക്യൂ ബുക്കു ചെയ്തും സ്പോർട്ട് ബുക്കിങ് നടത്തിയും തീർഥാടകർക്ക് ദർശനം നടത്താവുന്നാതണ്.

തന്ത്രി കണ്ഠര് മഹേഷ് മോഹനരുടെ കാർമികത്വത്തിൽ എല്ലാ ദിവസവും രാവിലെ 5.30ന് നടക്കുന്ന മഹാഗണപതി ഹോമത്തോടെ പൂജ തുടങ്ങും. 25 വരെ പൂജകൾ ഉണ്ടാകും. ദിവസവും രാവിലെ 5.30ന് നെയ്യഭിഷേകം ആരംഭിക്കും. 17 മുതൽ 24 വരെ 11.30 മുതൽ 12.30 വരെ ഉത്സവബലി ദർശനവും രാത്രി 7.30ന് ശ്രീഭൂതബലിയും നടക്കും. 20 മുതൽ 24 വരെ രാത്രി ശ്രീഭൂതബലിക്കു ശേഷം വിളക്കിനെഴുന്നള്ളിപ്പ് ഉണ്ടാകും.

Also Read: പത്മജയ്ക്കും അനിലിനും ഏത് പാര്‍ട്ടിയില്‍ വേണമെങ്കിലും പോകാം, തെറ്റുകാണുന്നില്ല: ചാണ്ടി ഉമ്മന്‍

ആറാട്ട് ദിവസമായ 25ന് ദർശനത്തിനും പതിനെട്ടാംപടി കയറുന്നതിനും നിയന്ത്രണമുണ്ട്. അന്ന് രാവിലെ 9ന് നട അടച്ചാണ് പമ്പയിലേക്ക് ആറാട്ട് ഘോഷയാത്ര പുറപ്പെടുന്നത്. ആറാട്ടിനുശേഷം തിരിച്ച് സന്നിധാനത്തെത്തി നട തുറന്ന ശേഷമേ ദർശനത്തിന് അവസരം ലഭിക്കൂ.