അരാഷ്ട്രീയ ക്യാമ്പസ്സുകളിൽ തീവ്രവാദ സംഘടനകൾ പിടി മുറുക്കുന്നു: പിണറായി

തിരുവനന്തപുരം: തീവ്രവാദസംഘടനകളും വർഗീയ സംഘടനകളും കേരളത്തിലെ അരാഷ്ട്രീയ ക്യാമ്പസ്സുകളിൽ പിടി മുറുക്കുകയാണെന്ന് മുഖ്യമന്ത്രി പിണറായി വിജയൻ. വിദ്യാർഥി രാഷ്ട്രീയം നിരോധിച്ചാൽ എല്ലാം ഭദ്രവും സ്വസ്ഥവുമാകുമെന്നും ക്യാമ്പസുകളിൽ സമാധാനം പുലരുമെന്നും പ്രവചിച്ചവർ അരാഷ്ട്രീയ ക്യാമ്പസുകളിൽ ആരൊക്കെയാണ് പിടിമുറുക്കുന്നതെന്ന് കണ്ണ് തുറന്നു കാണണം.

തീവ്രവാദ സംഘടനകൾ, വര്‍ഗീയ ശക്തികൾ, ജാതിസംഘടനകൾ, മദ്യ-മയക്കുമരുന്ന് മാഫിയ തുടങ്ങിയവരാണ് കേരളത്തിലെ രാഷ്ട്രീയ ജാഗ്രതയുണ്ടായിരുന്ന ക്യാമ്പസുകളിൽ പോലും പിടിമുറുക്കിയിരിക്കുന്നതെന്ന് അദ്ദേഹം പറഞ്ഞു.

കേന്ദ്രീയ വിദ്യാലയ സംഘം സംഘടിപ്പിച്ച റീജ്യണൽ യൂത്ത് പാര്‍ലമെന്റിൽ സംസാരിക്കുകയായിരുന്നു പിണറായി.മതനിരപേക്ഷ സന്ദേശം പ്രചരിപ്പച്ചിരുന്ന ക്യാമ്പസുകളെ ജാതി- മത-ദരിദ്ര-സങ്കുചിത കമ്പാർട്ട്മെൻറുകളായി തിരിച്ചു ഇളം മനസ്സുകളെ തെറ്റായ വഴിയിൽ നയിക്കാനുളള ശ്രമങ്ങളെ കരുതിയിരിക്കണം.

അതിനെ നേരിടാൻ അരാഷ്ട്രീയത കൊണ്ടാവില്ല. അരാഷ്ട്രീയത ഒന്നിനും മറു മരുന്നല്ല. സമൂഹത്തിന് ഗുണകരമായ രാഷ്ട്രീയ ബോധം ഉയർന്നു വരേണ്ടതുണ്ട്. ഇക്കാര്യത്തിൽ വിദ്യാർഥി സമൂഹം ജാഗ്രത പാലിക്കണമെന്നും മുഖ്യമന്ത്രി കൂട്ടിച്ചേർത്തു.