എറണാകുളത്തെ ക്യാമ്പുകളുടെ ചുമതല തഹസില്‍ദാര്‍മാര്‍ക്ക്

കൊച്ചി: എറണാകുളത്തെ താലൂക്കുകളിലെ ദുരിതാശ്വാസ ക്യാമ്പുകളുടെ പൊതുവായ ചുമതല തഹസില്‍ദാര്‍മാര്‍ക്ക് നല്‍കി. ജില്ലാ കളക്ടര്‍ മുഹമ്മദ് വൈ സഫിറുള്ളയാണ് ഇതുസംബന്ധിച്ച് ഉത്തരവിറക്കിയത്. വില്ലേജ് തലത്തില്‍ വില്ലേജ് ഓഫീസര്‍മാര്‍ തഹസില്‍ദാര്‍മാരെ സഹായിക്കും. ഓരോ ക്യാമ്പിനും പ്രത്യേകം ചാര്‍ജ് ഓഫീസറും ഉണ്ടായിരിക്കും.

പ്രളയം കൂടുതലായി ബാധിച്ച ആലുവ, പറവൂര്‍ താലൂക്കുകളില്‍ ഡപ്യൂട്ടി കളക്ടര്‍മാരാണ് ക്യാമ്പുകളുടെ പൊതുവായ മേല്‍നോട്ട ചുമതല നിര്‍വഹിക്കുക. അഞ്ച് തഹസില്‍ദാര്‍മാരെ വീതം ഈ രണ്ടു താലൂക്കുകളിലും നിയോഗിച്ചിട്ടുള്ളതായും അധികൃതര്‍ അറിയിച്ചു.