ശബരിമല നട അടയ്ക്കും; തന്ത്രിയെ പിന്തുണച്ച് മേല്‍ശാന്തി

പത്തനംതിട്ട: ആചാരം ലംഘിച്ചാല്‍ ശബരിമല നട അടച്ചിടുമെന്ന തന്ത്രിയുടെ പ്രസ്താവനയെ പിന്തുണച്ച് മേല്‍ശാന്തി. മാളികപ്പുറം മേല്‍ശാന്തി അനീഷ് നമ്പൂതിരിയാണ് തന്ത്രിക്ക് പിന്തുണയുമായി രംഗത്തെത്തിയത്. ശബരിമല നട അടച്ചിടുമെന്ന തന്ത്രിയുടെ പ്രസ്താവനയില്‍ തെറ്റില്ലെന്നും നട അടച്ചിടാന്‍ തന്ത്രിക്ക് അവകാശമുണ്ടെന്നും മേല്‍ശാന്തി പറഞ്ഞു. ഏഷ്യാനെറ്റ് ന്യൂസ് ചാനലിന് നല്‍കിയ അഭിമുഖത്തിലാണ് മേല്‍ശാന്തിയുടെ പ്രതികരണം.

പരികര്‍മ്മികളുടെ പ്രതിഷേധത്തെയും മേല്‍ശാന്തി പിന്തുണച്ചു. പരികര്‍മ്മികളുടെ പ്രതിഷേധം ക്ഷേത്രത്തിന് കളങ്കമുണ്ടാക്കിയെന്ന് പറയാനാവില്ല. ഇക്കാര്യത്തില്‍ ആര്‍ക്കെതിരെയും നടപടിയെടുക്കാന്‍ ദേവസ്വം ബോര്‍ഡിനാവില്ലെന്നും അനീഷ് നമ്പൂതിരി പറഞ്ഞു. അതേസമയം സ്ത്രീകള്‍ ശബരിമല കയറിയാല്‍ നട അടയ്ക്കുമെന്ന നിലപാടിനോട് യോജിപ്പില്ലെന്ന് ദേവസ്വം ബോര്‍ഡംഗം കെപി ശങ്കരദാസ് വ്യക്തമാക്കി.