ശബരിമല സംഘര്‍ഷം: അന്വേഷണത്തില്‍ ഇടപെടാനാകില്ലെന്ന് ഹൈക്കോടതി

കൊച്ചി: ശബരിമല സ്ത്രീപ്രവേശനവുമായി ബന്ധപ്പെട്ട സുപ്രീം കോടതി വിധിക്ക് പിന്നാലെ അരങ്ങേറിയ അക്രമസംഭവങ്ങളില്‍ ജുഡീഷ്യല്‍ അന്വേഷണം വേണമെന്ന ആവശ്യം തള്ളി ഹൈക്കോടതി. സംസ്ഥാന സര്‍ക്കാരിന്‍റെ വിവേചനാധികാരത്തില്‍ ഇടപെടാനാകില്ലെന്ന് ഹൈക്കോടതി വ്യക്തമാക്കി. സംഭവത്തില്‍ ഏത് അന്വേഷണം വേണമെന്ന് തീരുമാനിക്കാനുള്ള പൂര്‍ണ അധികാരം സര്‍ക്കാരിന്‍റേതാണ്. ഇക്കാര്യത്തില്‍ കോടതിക്ക് ഇടപെടാനാവില്ലെന്നും ഹൈക്കോടതി വ്യക്തമാക്കി.

ഇത്തരം സാഹചര്യങ്ങളില്‍ സര്‍ക്കാരിന് മുന്‍കൂട്ടി നിര്‍ദ്ദേശം നല്‍കാനാവില്ല. അന്വേഷണത്തില്‍ ഏതെങ്കിലും തരത്തില്‍ വീഴ്ചകള്‍ ഉണ്ടായാല്‍ അക്കാര്യം ചൂണ്ടിക്കാട്ടാന്‍ മാത്രമേ കോടതിക്ക് കഴിയൂവെന്നും ഹൈക്കോടതി വ്യക്തമാക്കി. ഇതിന്‍റെ അടിസ്ഥാനത്തില്‍ ജുഡീഷ്യല്‍ അന്വേഷണം വേണമെന്ന് ആവശ്യപ്പെട്ട് സമര്‍പ്പിച്ച ഹര്‍ജി പിന്‍വലിക്കുകയാണെന്ന് ഹര്‍ജിക്കാരന്‍ കോടതിയെ അറിയിച്ചു.

ഈ മാസം 17 മുതല്‍ 20 വരെ സേവ് ശബരിമല മുദ്രാവാക്യവുമായി അയ്യപ്പ ഭക്തരെന്ന പേരിൽ ചിലര്‍ നിലയ്ക്കലിലും പമ്പയിലും സന്നിധാനത്തും നടത്തിയ അക്രമ സംഭവങ്ങളില്‍ അന്വേഷണം ആവശ്യപ്പെട്ടാണ് കൊല്ലം സ്വദേശിയായ രാജേന്ദ്രന്‍ കോടതിയെ സമീപിച്ചത്. ശബരിമലയിലെ പൊലീസ് നടപടിയിലും ഐജിമാരായ മനോജ് എബ്രഹാം, ശ്രീജിത്ത് എന്നിവര്‍ക്കെതിരെയും അന്വേഷണം വേണമെന്നും ഹര്‍ജിക്കാരന്‍ ആവശ്യപ്പെട്ടിരുന്നു.