ജിഷ വധക്കേസിലെ നിർണായക വിധി ഇന്ന് പ്രസ്താവിക്കും

കൊച്ചി: പെരുമ്പാവൂരില്‍ ജിഷ കൊല്ലപ്പെട്ട കേസിൽ കോടതി ഇന്ന് വിധി പറയും. ജുഡീഷ്യൽ കസ്റ്റഡിയിൽ കഴിയുന്ന പ്രതി അമിറുൾ ഇസ്ലാമിന് വധശിക്ഷ നൽകണമെന്നാണ് പ്രൊസിക്യൂഷൻ ശക്തമായി വാദിച്ചിരിക്കുന്നത്. എറണാകുളം പ്രിൻസിപ്പൽ സെഷൻസ് കോടതിയാണ് വിചാരണ പൂർത്തിയാക്കി കേസിൽ വിധി പറയുന്നത്. കഴിഞ്ഞ മാസം അവസാനത്തോടെയാണ് കേസിൽ അന്തിമവാദം പൂര്‍ത്തിയാക്കിയത്. രാവിലെ പതിനൊന്ന് മണിയോടെ കോടതി വിധി പ്രസ്താവിക്കും. ഒൻപത് മാസത്തെ വിചാരണയ്ക്ക് ശേഷമാണ് കോടതി ഇന്ന് വിധി പറയുന്നത്. പ്രതിക്കെതിരായ ശാസ്ത്രീയ തെളിവുകൾ അണിനിരത്തിയായിരുന്നു പ്രോസിക്യൂഷൻ്റെ വാദം. കേസുമായി ബന്ധപ്പെട്ട് പ്രോസിക്യൂഷൻ കോടതിയിൽ 293 രേഖകളും 36 തൊണ്ടിമുതലുകളുമാണ് ഹാജരാക്കിയത്.

വീടിനുള്ളിൽ അന്യായമായി തടഞ്ഞുവയ്ക്കൽ, അതിക്രമിച്ചു കയറൽ, കൊലയ്ക്കു ശേഷം തെളിവു നശിപ്പിക്കൽ, ദലിത് പീഡന നിരോധന നിയമത്തിലെ വിവിധ വകുപ്പുകൾ പ്രകാരമുള്ള കുറ്റങ്ങൾ എന്നിവയാണ് പ്രതിക്കെതിരെ ചുമത്തിയിട്ടുള്ളത്. ഇവയെല്ലാം ചൂണ്ടിക്കാട്ടി പ്രതിക്കെതിരെ പരമാവധി ശിക്ഷയാണു പ്രോസിക്യൂഷൻ ആവശ്യപ്പെടുന്നത്. 2016 ഏപ്രിൽ 28നാണ് പെരുമ്പാവൂർ കുറുപ്പംപടിയിലെ അടച്ചുറപ്പില്ലാത്ത വീട്ടിലേക്ക് പ്രതി അതിക്രമിച്ചു കയറി ജിഷയെ മാനഭംഗപ്പെടുത്തി കൊലപ്പെടുത്തിയത്.