തിങ്കളാഴ്ച മുതൽ തിരുവനന്തപുരം-ചെന്നൈ മെയിൽ സർവീസ് ആരംഭിക്കും

തിരുവനന്തപുരം: ലോക്ക് ഡൗൺ പ്രഖ്യാപിച്ചതിനു ശേഷം ആദ്യമായി തിരുവനന്തപുരം-ചെന്നൈ മെയിൽ ഓടിത്തുടങ്ങും. തിങ്കളാഴ്ച മുതലാണ് സ‍ര്‍വ്വീസ് പുനഃരാരംഭിക്കുന്നത്. സ്പെഷ്യൽ ട്രെയിനായി പ്രതിദിന സ‍ര്‍വ്വീസ് ഞായറാഴ്ച ചെന്നൈയിൽ നിന്നും ആരംഭിക്കാനാണ് ദക്ഷിണ റെയിൽവേയുടെ തീരുമാനം.

അൺലോക്കിന്റെ ഭാഗമായി ജനശദാബ്ദിയും മുംബൈ-ഡൽഹി സ്പെഷ്യൽ ട്രെയിനുകളും കേരളത്തിൽ നിന്നും ദക്ഷിണ റെയിൽവേ ജൂൺ ഒന്നിന് ആരംഭിച്ചിരുന്നു. എന്നാൽ ക‍ണ്ണാടകയിലേക്കും തമിഴ്നാട്ടിലേക്കും സ‍ര്‍വ്വീസ് ആരംഭിച്ചിരുന്നില്ല. തമിഴ്നാട്ടിൽ സ‍ര്‍വ്വീസുകൾ വിപുലമാക്കുന്നതിന്റെ ഭാഗമായാണ് തിരുവനന്തപുരത്തേക്കും മംഗലാപുരത്തേക്കും സ‍ര്‍വ്വീസുകൾ ആരംഭിക്കുന്നത്.

Also Read: റേഷന്‍ കടകളുടെ പ്രവര്‍ത്തന സമയത്തില്‍ ഒക്ടോബര്‍ ഒന്നുമുതല്‍ മാറ്റം

തിരുവനന്തപുരം-ചെന്നൈ മെയിലിന്റെ സമയത്ത് ഈ മാസം 27 മുതൽ സ്പെഷ്യൽ ട്രെയിൻ ഓടിത്തുടങ്ങും. രാത്രി 7.45ന് ചെന്നൈയിൽ നിന്നും ആരംഭിച്ച് പിറ്റേന്ന് രാവിലെ 11.45ന് തിരുവനന്തപുരത്തെത്തും. തിരുവനന്തപുരത്തു നിന്നും ഉച്ചകഴിഞ്ഞ് മൂന്ന് മണിക്ക് പുറപ്പെട്ട് പിറ്റേന്ന് 7.40നാണ് ചെന്നൈയിലെത്തുക. തിരുവനന്തപുരത്തു നിന്നും ചെന്നൈയിലേക്കുള്ള സ്പെഷ്യൽ ട്രെയിൻ തിങ്കളാഴ്ചയാണ് പുറപ്പെടുക.

ചെന്നൈയിൽ നിന്നും പാലക്കാട്, കോഴിക്കോട് വഴി മംഗലാപുരത്തേക്കുള്ള സ‍ര്‍വ്വീസ് ഞായറാഴ്ച ആരംഭിക്കും. രാത്രി 8.10ന് പുറപ്പെട്ട് അടുത്ത ദിവസം ഉച്ചയ്ക്ക് 12.10നാണ് മംഗലാപുരത്ത് ട്രെയിൻ എത്തുക.