തോമസ് ചാണ്ടിയ്ക്ക് അന്ത്യാഞ്ജലി അര്‍പ്പിച്ച് ആയിരങ്ങള്‍

ആലപ്പുഴ: അന്തരിച്ച മുന്‍ ഗതാഗതമന്ത്രിയും കുട്ടനാട് എംഎല്‍എയുമായ തോമസ് ചാണ്ടി (72) യ്ക്ക് അന്ത്യാഞ്ജലി അര്‍പ്പിച്ച് ആയിരങ്ങള്‍. ഉച്ചയ്ക്ക് 2 ന് ചേന്നങ്കരി സെന്റ് പോള്‍സ് മാര്‍ത്തോമാ പള്ളിയിലെത്തിച്ച് 2.30 നു സംസ്‌കാരം നടത്തി.

ആലപ്പുഴ ഇഎംഎസ് സ്റ്റേഡിയത്തില്‍ പൊതുദര്‍ശനത്തിന് വച്ചു. അതിനു ശേഷം ഭൗതീകശരീരം വീട്ടിലെത്തിക്കുകയായിരുന്നു. മന്ത്രി എ കെ ശശീന്ദ്രന്‍, എന്‍സിപി ദേശീയ ജനറല്‍ സെക്രട്ടറി ടി പി പീതാംബരന്‍, മാണി സി കാപ്പന്‍ എം എല്‍ എ തുടങ്ങിയവര്‍ അനുഗമിച്ചു.

മന്ത്രിമാരായ ഇ പി ജയരാജന്‍, രാമചന്ദ്രന്‍ കടന്നപ്പള്ളി, കടകംപള്ളി സുരേന്ദ്രന്‍, തോമസ് ഐസക്, ജെ മേഴ്‌സിക്കുട്ടിയമ്മ, കെ ടി ജലീല്‍, പി തിലോത്തമന്‍, പ്രതിപക്ഷ നേതാവ് രമേശ് ചെന്നിത്തല, മുന്‍ മുഖ്യമന്ത്രി ഉമ്മന്‍ ചാണ്ടി, മന്ത്രി എ കെ ബാലന്‍, കൊടിക്കുന്നില്‍ സുരേഷ് എം പി തുടങ്ങിയവര്‍ അന്ത്യാഞ്ജലി അര്‍പ്പിച്ചു.

എറണാകുളത്തെ വീട്ടിൽ വെച്ച് ഡിസംബര്‍ 20 നാണ് മരണം സംഭവിച്ചത്. ഏറെ നാളായി അർബുദ രോഗത്തെ തുടർന്ന് ചികിൽസയിലായിരുന്നു. കുട്ടനാട് എംഎൽഎയായിരുന്നു തോമസ് ചാണ്ടി. പിണറായി വിജയൻ സർക്കാരിൽ ഗതാഗതവകുപ്പ് മന്ത്രിയായിരുന്നു തോമസ് ചാണ്ടി. നിലവിൽ എൻസിപി സംസ്ഥാന അധ്യക്ഷനാണ് അദ്ദേഹം. അർബുദ ബാധയെ തുടർന്ന് കഴിഞ്ഞ പത്ത് വർഷത്തിലേറെയായി ചികിൽസയിലായിരുന്നു തോമസ് ചാണ്ടി. ആരോഗ്യനില കൂടുതൽ വഷളായതിനെ തുടർന്ന് റേഡിയേഷൻ അടക്കമുള്ള ചികിൽസ കഴിഞ്ഞ ദിവസം ആരംഭിച്ചിരുന്നു. ഇതിനിടെയാണ് മരണം സംഭവിച്ചത്.