ടിക് ടോക്കിലെ 'നില്ല് നില്ല് ചലഞ്ചി'നെ ചൊല്ലി കൂട്ടത്തല്ല്; സംഭവം തിരൂരിൽ

മലപ്പുറം : സമൂഹ മാധ്യമങ്ങളിൽ വൈറലായ 'നില്ല് നില്ല് ചലഞ്ച്' അവസാനിച്ചത് കൂട്ടത്തല്ലിൽ. മലപ്പുറം തിരൂരാണ് സംഭവം നടന്നത്. സംഭവത്തിൽ എട്ട് പേര്‍ക്ക് പരിക്കേറ്റു. ക്രിക്കറ്റ് ബാറ്റും, സ്റ്റംപും, കത്തിയും, കുറുവടികളുമായി വിദ്യാര്‍ഥികളും നാട്ടുകാരും ഏറ്റുമുട്ടുകയായിരുന്നു. മുൻപും നില്ല് നില്ല് ചലഞ്ച് പലയിടത്തും വിവാദമുണ്ടാക്കിയിരുന്നു. അപകടകരമാം വിധം ഈ ചലഞ്ച് യുവാക്കളിൽ ഹരമാകുന്നത് പോലീസ് വിലക്കിയിരുന്നു.

ടിക് ടോക് ആപ്ലിക്കേഷനിലെ നില്ല് നില്ല് ചലഞ്ച് അടുത്തിടെയാണ് വൈറൽ ട്രെൻ്ഡായി മാറിയത്. മരച്ചില്ലകളുമായി ഓടുന്ന വാഹനത്തിൻ്റെ മുന്നിലേക്ക് ചാടിവീണ് ജാസി ഗിഫ്റ്റ് പാടിയ നില്ല് നില്ല് എന്ന ഗാനത്തിനൊപ്പം ചുവടുവെയ്ക്കുന്ന രീതിയാണ് ഈ ചാലഞ്ച്. ഓടുന്ന തീവണ്ടിക്കു മുമ്പിലും പോലീസ് വാഹനങ്ങള്‍ക്കു മുന്നിലും ബസുകള്‍ക്കു മുന്നിലും മരച്ചില്ലകളുമായി ചാടി വീഴുന്നത് അപകടങ്ങള്‍ ക്ഷണിച്ചു വരുത്തുമെന്നും അത്തരം ചാലഞ്ചുകളെ പ്രോത്സാഹിപ്പിക്കരുതെന്നും പോലീസ് മുന്നറിയിപ്പ് നൽകിയിരുന്നു.


നഗരത്തില്‍ ഓടുന്ന വാഹനം തടഞ്ഞു നിര്‍ത്തി നൃത്തം ചെയ്തതാണ് സംഘര്‍ഷത്തിന് കാരണമായത്. വെള്ളിയാഴ്ചയായിരുന്നു സംഭവത്തിനാസ്പദമായ സംഭവം നടന്നത്. അത്ത് ഈ ചാലഞ്ച് വൻ ഗതാഗതക്കുരുക്കിന് കാരണമായിരുന്നു. ഇത് വന്‍ ജനരോഷത്തിലേക്കും വഴിവെച്ചു. തുടര്‍ന്നുണ്ടായ സംഘര്‍ഷാവസ്ഥ അന്ന് പരിഹരിച്ചത് മുതിര്‍ന്നവര്‍ ഇടപെട്ടായിരുന്നു.

എന്നാൽ വിദ്യാര്‍ത്ഥികൾ സംഘടിച്ച് സംഭവസ്ഥലത്ത് എത്തി നാട്ടുകാരെ അകാരണമായി മര്‍ദ്ദിക്കുകയായിരുന്നു. വിദ്യാര്‍ത്ഥികളുടെ കല്ലേറിൽ സമീപത്തെ കടയിലെ ജോലിക്കാരിയുടെ തലയ്ക്ക് പരിക്കേൽക്കുകയും ചെയ്തു. കടയിലെ ഗ്ലാസ് പൊട്ടി തലയില്‍ വീഴുകയായിരുന്നു. സംഘര്‍ഷത്തിന് ശേഷം വിദ്യാര്‍ഥികള്‍ പലയിടത്തേയ്ക്കായി ഓടി രക്ഷപ്പെടുകയായിരുന്നു. പോലീസ് അന്വേഷണം ആരംഭിച്ചിട്ടുണ്ട്.