കെ.പി.ശശികലക്ക് കോടതി ജാമ്യം അനുവദിച്ചു

തിരുവല്ല: ഹിന്ദു ഐക്യ വേദി സംസ്ഥാനാധ്യക്ഷ കെ.പി.ശശികലക്ക് ജാമ്യം. തിരുവല്ല സബ് ഡിവിഷണൽ മജിസ്‌ട്രേറ്റാണ് ജാമ്യം അനുവദിച്ചത്. ആരോഗ്യം അനുവദിച്ചാൽ ശബരിമലക്ക് പോകുമെന്ന് ശശികല പ്രതികരിച്ചു.

ഇന്ന് പുലർച്ചെയാണ് ശശികലയെ ശബരിമലയിൽ നിന്ന് അറസ്റ്റ് ചെയ്തത്. ആറ് മണിക്കൂർ കഴിഞ്ഞിട്ടും ശശികല മടങ്ങാൻ കൂട്ടാക്കാതിരുന്നതിനെ തുടർന്നാണ് അറസ്റ്റ് ചെയ്തത് റാന്നി പോലീസ് സ്റ്റേഷനിലേക്ക് മാറ്റിയത്. കരുതൽ തടങ്കലിലാണ് ശശികലയെ വെച്ചിട്ടുള്ളതെന്ന് പോലീസ് വ്യക്തമാക്കി.

പോലീസ് സ്റ്റേഷൻ ജാമ്യത്തിൽ വിട്ടയക്കാമെന്ന് പോലീസ് വ്യക്തമാക്കിയപ്പോൾ ശശികല അത് നിരസിച്ചു. തന്നെ കോടതിയിൽ ഹാജരാക്കണമെന്നും ജാമ്യം ലഭിച്ചാൽ അറസ്റ്റ് ചെയ്ത മരക്കൂട്ടത്ത് തന്നെ തിരികെ എത്തിക്കണമെന്നും പോലീസിനോട് ശശികല ആവശ്യപ്പെട്ടിരുന്നു. തുടർന്ന് ഡോക്ടർ ആരോഗ്യ നില പരിശോധിച്ച് ഉറപ്പ് വരുത്തിയ ശേഷമാണ് ശശികലയെ തിരുവല്ല കോടതിയിലേക്ക് കൊണ്ട് പോയത്.

അറസ്റ്റ് ചെയ്ത് റാന്നി പോലീസ് സ്റ്റേഷനിൽ കൊണ്ട് വന്ന സമയം മുതൽ ശശികല ഉപവാസത്തിലായിരുന്നു. ജാമ്യം ലഭിച്ചതോടെ ഉപവാസം അവസാനിപ്പിക്കുകയാണെന്ന് ശശികല വ്യക്തമാക്കി.