20 കോടി പോരാ; മുന്നോട്ടു പോകാൻ കൂടുതൽ പണം വേണമെന്ന് തച്ചങ്കരി

തിരുവനന്തപുരം: പ്രതിമാസ ചെലവുകള്‍ക്കായി സംസ്ഥാന സര്‍ക്കാര്‍ കെഎസ്ആര്‍ടിസിയ്ക്ക് അനുവദിക്കുന്ന 20 കോടി രൂപ തികയുന്നില്ലെന്ന് എംഡി ടോമിൻ തച്ചങ്കരി. തുക 36.56 കോടിയായി വര്‍ദ്ധിപ്പിക്കണമെന്നും ഇല്ലെങ്കിൽ പ്രവര്‍ത്തനങ്ങള്‍ മുന്നോട്ടുകൊണ്ടുപോകാൻ പറ്റില്ലെന്നും അറിയിച്ച് തച്ചങ്കരി സര്‍ക്കാരിന് കത്ത് നല്‍കി.

ഡീസൽ, സ്പെയര്‍പാട്സ്, ടയര്‍ എന്നിവ വാങ്ങിയ ഇനത്തിൽ വൻ തുക കടമുണ്ടെന്നും പണം നൽകാത്തതിനാൽ പലരും സാധനങ്ങള്‍ നല്‍കുന്നത് നിര്‍ത്തിവെച്ചിരിക്കുകയാണെന്നും തച്ചങ്കരി അറിയിച്ചു. ഇതിനു പുറമെ പണദൗര്‍ലഭ്യം മൂലം ജീവനക്കാരുടെ മെഡിക്കൽ റീഇംപഴ്സ്മെന്‍റ്, സപ്ലിമെന്‍ററി സാലറി തുടങ്ങിയ തുകകളം അനുവദിക്കാൻ കഴിയുന്നില്ല. കൂടാതെ ഹൈക്കോടതി ഉത്തരവ് പ്രകാരം നവംബര്‍ മുതൽ ജീവനക്കാരുടെ ശമ്പളത്തിൽ നിന്ന് പിടിക്കുന്ന തുകയായ 12 കോടി ശമ്പളത്തോടൊപ്പം അടയ്ക്കണമെന്നും നിര്‍ദേശിച്ചിട്ടുണ്ട്. ഇതിനായി 12 കോടി അധികം കണ്ടെത്തേണ്ടതുണ്ട്. 2016 ജനുവരി മുതൽ സര്‍ക്കാര്‍ അനുവദിച്ച ഒരു ഗഡു ഡിഎ കോര്‍പ്പറേഷനിലെ ജീവനക്കാര്‍ക്കും പെൻഷൻകാര്‍ക്കും നൽകാൻ 4.56 കോടി രൂപ അധികമായി വേണമെന്നും കത്തിൽ ചൂണ്ടിക്കാട്ടിയിട്ടുണ്ട്.