ഇന്ന് ആശുപത്രിയിൽ പ്രവേശിപ്പിച്ചത് 2667 പേരെ
ഓരോ ദിവസവും കൊവിഡ് രോഗലക്ഷണങ്ങളോടെ ആശുപത്രിയിൽ പ്രവേശിപ്പിക്കുന്നവരുടെ എണ്ണവും സംസ്ഥാനത്ത് ആശങ്കകൾ ഉയർത്തുകയാണ്. കഴിഞ്ഞ 24 മണിക്കൂറിനിടെ 2667 പേരെയാണ് കൊവിഡ് രോഗലക്ഷണങ്ങളോടെ ആശുപത്രിയിൽ പ്രവേശിപ്പിച്ചത്. നിലവിൽ 22,123 പേരാണ് വിവിധ ആശുപത്രികൾ നിരീക്ഷണത്തിൽ കഴിയുന്നത്. വീട്/ഇന്സ്റ്റിറ്റിയൂഷണല് ക്വാറന്റൈനിലുള്ളത് 2,71,499 പേരാണെന്നും ആരോഗ്യവകുപ്പ് പുറത്തുവിട്ട കണക്കുകൾ വ്യക്തമാക്കുന്നു. ആകെ നിരീക്ഷണത്തിലുള്ളവരുടെ എണ്ണം 2,93,622 ആണ്.
തിരുവനന്തപുരത്ത് കേസുകൾ കുറഞ്ഞ് തുടങ്ങി
സംസ്ഥാനത്ത് പ്രതിദിന രോഗബാധയിൽ ഏറ്റവും അധികം ആശങ്ക ഉയർത്തിയിരുന്ന ജില്ല തിരുവനന്തപുരമായിരുന്നു. എന്നാൽ കഴിഞ്ഞ കുറച്ച് ദിവസങ്ങളായി തിരുവനന്തപുരത്ത് നിന്ന് പുറത്ത് വരുന്ന കണക്കുകൾ കേസുകളിൽ കുറവുണ്ടാകുന്നു എന്ന സൂചനയാണ് നൽകുന്നത്. ശനിയാഴ്ച തിരുവനന്തപുരത്ത് 790 പേർക്കായിരുന്നു രോഗം സ്ഥിരീകരിച്ചത്. അതേസമയം ഇന്ന് 591 പേർക്ക് മാത്രമാണ് ജില്ലയിൽ വൈറസ് ബാധ സ്ഥിരീകരിച്ചത്. ഇന്ന് 831 പേർക്ക് രോഗമുക്തിയും ലഭിച്ചിട്ടുണ്ട്. നിലവിൽ 8521 പേരാണ് തിരുവനന്തപുരത്ത് കൊവിഡ് സ്ഥിരീകരിച്ച് ചികിത്സയിലുള്ളത്.
ആശങ്കയാകുന്ന എറണാകുളം
സംസ്ഥാന ആരോഗ്യ വകുപ്പ് പുറത്ത് വിട്ട കണക്കുകൾ പ്രകാരം ഇന്ന് ഏറ്റവും കൂടുതൽ കൊവിഡ് കേസുകൾ റിപ്പോർട്ട് ചെയ്ത ജില്ല എറണാകുളമാണ്. 1042 പേർക്കാണ് ഇന്ന് ഇവിടെ രോഗം സ്ഥിരീകരിച്ചത്. ജില്ലയിൽ ചികിത്സയിലുണ്ടായിരുന്ന 808 പേർക്ക് രോഗമുക്തിയും ലഭിച്ചിട്ടുണ്ട്. നിലവിൽ 12806 പേരാണ് ഇവിടെ കൊവിഡ് ചികിത്സയിലുള്ളത്. പത്തായിരത്തിലധികം രോഗികൾ ചികിത്സയിലുള്ളത് എറണാകുളത്തും തൃശൂരും മാത്രമാണ്.
വിവിധ ജില്ലകളിൽ ചികിത്സയിലുള്ളവരുടെ എണ്ണം
സംസ്ഥാനത്ത് വിവിധ ജില്ലകളിലായി കൊവിഡ്-19 സ്ഥിരീകരിച്ച് 89,675 പേരാണ് നിലവിൽ ചികിത്സയിൽ കഴിയുന്നതെന്നാണ് ആരോഗ്യ വകുപ്പ് വ്യക്തമാക്കിയിരിക്കുന്നത്. ഏറ്റവും കൂടുതൽ പേർ ചികിത്സയിൽ കഴിയുന്നത് എറണാകുളത്താണ് 12806 പേർ. തിരുവനന്തപുരം 8521, കൊല്ലം 6516, പത്തനംതിട്ട 2638, ആലപ്പുഴ 8134, കോട്ടയം 5387, ഇടുക്കി 1342, തൃശൂർ 10442, പാലക്കാട് 7421, മലപ്പുറം 9151, കോഴിക്കോട് 9498, വയനാട് 826, കണ്ണൂർ 5292, കാസർകോട് 1701 എന്നിങ്ങനെയാണ് ജില്ലകളിൽ ചികിത്സയിൽ കഴിയുന്നവരുടെ എണ്ണം.