ടിപി സെന്‍കുമാറിന് വീണ്ടും ഡിജിപിയായി നിയമനം: ഉത്തരവ് നാളെയിറങ്ങും

തിരുവനന്തപുരം: സുപ്രീം കോടതി വിധിയുടെ പശ്ചാത്തലത്തില്‍ ടിപി സെന്‍കുമാറിനെ വീണ്ടും ഡിജിപിയായി നിയമിക്കാന്‍ സര്‍ക്കാരിന്‍റെ ത്വരിത നടപടി. സെന്‍കുമാറിനെ ഡിജിപിയായി നിയമിക്കുന്ന ഫയലില്‍ മുഖ്യമന്ത്രി പിണറായി വിജയന്‍ വെള്ളിയാഴ്‍ച വൈകീട്ട് ഒപ്പുവെച്ചു. ഉത്തരവ് ശനിയാഴ്‍ച ഇറങ്ങുമെന്നാണ് കരുതുന്നത്.

നേരത്തേ, സെന്‍കുമാറിനെ തിരികെ നിയമിക്കണമെന്ന ഉത്തരവില്‍ വ്യക്തത ആവശ്യപ്പെട്ട് സര്‍ക്കാര്‍ സമര്‍പ്പിച്ച ഹര്‍ജി സുപ്രീം കോടതി തള്ളിയിരുന്നു. സര്‍ക്കാരിനെ രൂക്ഷമായി വിമര്‍ശിച്ച കോടതി 25000 രൂപ കോടതി ചിലവായി അടയ്ക്കണമെന്നും ആവശ്യപ്പെട്ടിരുന്നു. വിധി നടപ്പാക്കാത്ത സര്‍ക്കാരിനെതിരെ സെന്‍കുമാര്‍ സമര്‍പ്പിച്ച കോടതിയലക്ഷ്യ ഹര്‍ജി സുപ്രീം കോടതി ഫയലില്‍ സ്വീകരിക്കുകയും ചെയ്‍തു.

വെള്ളിയാഴ്‍ച തിരുവനന്തപുരത്ത് നടന്ന സിപിഎം സംസ്ഥാന സെക്രട്ടേറിയറ്റ് യോഗവും കോടതി വിധി ചര്‍ച്ച ചെയ്‍തിരുന്നു. ഉത്തരവ് ഉടന്‍ നടപ്പാക്കണമെന്ന് യോഗവും ആവശ്യപ്പെട്ടിരുന്നു. സെന്‍കുമാറിന്‍റെ ഹര്‍ജി കോടതി ചൊവ്വാഴ്‍ച പരിഗണിക്കും എന്നതിനാല്‍ അതിനു മുന്‍പ് ഉത്തരവിറക്കിയില്ലെങ്കില്‍ കോടതിയുടെ ശകാരം കേള്‍ക്കേണ്ടിവരുമെന്നതും പെട്ടെന്ന് ഉത്തരവിറക്കാന്‍ സര്‍ക്കാരിനെ സമ്മര്‍ദ്ദത്തിലാക്കിയിട്ടുണ്ട്.

നിലവില്‍ ഡിജിപി സ്ഥാനം വഹിച്ചിരുന്ന ലോക്നാഥ് ബെഹ്റയെ വിജിലന്‍സ് മേധാവിയായും നിയമിച്ചിട്ടുണ്ട്. എന്നാല്‍ മുന്‍ വിജിലന്‍സ് മേധാവിയായിരുന്ന ജേക്കബ് തോമസിന്‍റെ കാര്യത്തില്‍ തീരുമാനമായിട്ടില്ല.

TP Senkumar: Appointment order soon

Chief Minister Pinarayi Vijayan signed the file to appoint TP Senkumar as DGP of Kerala.