TP Senkumar: പോലീസ് ഉപദേഷ്ടാവ് വേണ്ടെന്ന് ടി പി സെൻകുമാര്‍

തിരുവനന്തപുരം: മുഖ്യമന്ത്രിയ്ക്കും ഡിജിപിയ്ക്കും ഇടയിൽ മറ്റൊരു അധികാരകേന്ദ്രം ഉണ്ടാവരുതെന്ന നിര്‍ദേശവുമായി മുൻ ഡിജിപി ടി പി സെൻകുമാര്‍. മുഖ്യമന്ത്രി വിളിച്ചു ചേര്‍ത്ത മുൻഡിജിപിമാരുടെ യോഗത്തിലാണ് സെൻകുമാര്‍ മുഖ്യമന്ത്രിയ്ക്കും പോലീസിനും നിര്‍ദേശങ്ങള്‍ എഴുതി നല്‍കിയത്.

എസ്ഐ മുതൽ ഡിജിപിവരെയുള്ളവര്‍ക്ക് സ്വതന്ത്രമായി പ്രവര്‍ത്തിക്കാൻ കഴിയണം. ഐപിഎസിലെ അഴിമതിക്കാരെ പ്രധാനസ്ഥലങ്ങളിൽ നിന്ന് അകറ്റി നിര്‍ത്തണമെന്നും സ്റ്റേഷനുകളിലെ പോലീസ് അസോസിയേഷൻ ഭരണം നിയന്ത്രിക്കണമെന്നും സെൻകുമാര്‍ കത്തിൽ നിര്‍ദേശിച്ചു. മുഖ്യമന്ത്രിയ്ക്കുള്ള അതിസുരക്ഷ ആപത്താണ്. അതിസുരക്ഷ ഒരുക്കുന്ന പോലീസ് ഉന്നതരെ സൂക്ഷിക്കണമെന്നും മുഖ്യമന്ത്രിയെ സാധാരണക്കാരിൽ നിന്ന് അകറ്റാനുള്ള തന്ത്രമാണിതെന്നും സെൻകുമാര്‍ ചൂണ്ടിക്കാട്ടി. മുഖ്യമന്ത്രിയ്ക്ക് പിന്നാലെ ആംബുലൻസും ഫയര്‍ എൻജിനും ഓടേണ്ട കാര്യമില്ലെന്നും സെൻകുമാര്‍ കൂട്ടിച്ചേര്‍ത്തു.