ടിപി സിപിഎം വിരുദ്ധനായിരുന്നില്ലെന്ന് കോടിയേരി

കണ്ണൂര്‍: കൊല്ലപ്പെട്ട ആര്‍എംപി നേതാവ് സിപിഎം വിരുദ്ധനായിരുന്നില്ലെന്ന് സിപിഎം സംസ്ഥാന സെക്രട്ടറി കോടിയേരി ബാലകൃഷ്ണൻ. സിപിഎം നശിക്കണമെന്ന് ടിപിയ്ക്ക് താത്പര്യമുണ്ടായിരുന്നില്ലെന്നും പ്രശ്നം തീര്‍ന്നാൽ സിപിഎമ്മിനോട് അടുക്കാൻ ചന്ദ്രശേഖരൻ ആഗ്രഹിച്ചിരുന്നുവെന്നും കോടിയേരി പറഞ്ഞു. ആര്‍എംപിയെ കോൺഗ്രസിന്‍റെ കൂടാരത്തിൽ എത്തിക്കണമെന്നും ടിപി ആഗ്രഹിച്ചിരുന്നില്ല. എന്നാൽ ഇന്ന് ആര്‍എംപി കെകെ രമയുടെ മാത്രം പാര്‍ട്ടിയായി മാറിയെന്നും കോടിയേരി പറഞ്ഞു.

അതേസമയം കോടിയേരിയുടെ വാക്കുകളെ വിമര്‍ശിച്ച് ടിപി ചന്ദ്രശേഖരന്‍റെ ഭാര്യയും ആര്‍എംപി നേതാവുമായ കെ കെ രമ രംഗത്തെത്തി. സിപിഎമ്മിലേയ്ക്ക് മടങ്ങാൻ ആഗ്രഹിച്ചിരുന്നുവെങ്കിൽ എന്തിനാണ് ടിപിയെ കൊലപ്പെടുത്തിയതെന്ന് കെ കെ രമ ചോദിച്ചു. നാണമില്ലാതെ നുണ പറയുകയാണ് കോടിയേരി. അണികള്‍ കൊഴിഞ്ഞുപോകുന്നതിലെ വെപ്രാളമാണ് സിപിഎം പ്രകടിപ്പിക്കുന്നതെന്നും കെ കെ രമ പറഞ്ഞു.

2012 മെയ് നാലിനാണ് ആർഎംപി നേതാവായ ടി.പി. ചന്ദ്രശേഖരൻ കൊല്ലപ്പെട്ടത്. സിപിഎം പ്രവർത്തകനായിരുന്ന ടി.പി പാർട്ടിയുമായി തെറ്റിപ്പിരിഞ്ഞാണ് റവല്യൂഷണറി മാർക്സിസ്റ്റ് പാർട്ടി (ആർഎംപി) രൂപീകരിച്ചത്.