പൊതുപണിമുടക്ക്‌ തുടങ്ങി; കെഎസ്‌ആര്‍ടിസിയും ഓടില്ല

തിരുവനന്തപുരം: സ്ഥിരം തൊഴില്‍ വ്യവസ്ഥ ഇല്ലാതാക്കിയ കേന്ദ്ര സര്‍ക്കാര്‍ തീരുമാനത്തിനെതിരെ സംയുക്ത ട്രേഡ് യൂണിയന്റെ സംസ്ഥാന വ്യപകമായുള്ള 24 മണിക്കൂര്‍ പൊതു പണിമുടക്ക് ആരംഭിച്ചു. ഇന്നു രാത്രി 12 വരെയാണു പണിമുടക്ക്‌. ബിഎംഎസ് ഒഴികെയുള്ള തൊഴിലാളി സംഘടനകളാണ് പണിമുടക്കുന്നത്.

സര്‍ക്കാര്‍ ജീവനക്കാരും അധ്യാപകരും പണിമുടക്കില്‍ പങ്കുചേരും. ജീവനക്കാര്‍ പണിമുടക്കുന്നതിനാല്‍ കെഎസ്‌ആര്‍ടിസി സര്‍വ്വീസ് നടത്തില്ല. ഇന്ന് നടത്താനിരുന്ന കേരള, കാലിക്കറ്റ്, എംജി,കണ്ണൂര്‍ സര്‍വ്വകലാശാല പരീക്ഷകള്‍ പണിമുടക്കിനെ തുടര്‍ന്ന് മാറ്റി വച്ചിട്ടുണ്ട്. എന്നാല്‍ പിഎസ് സി പരീക്ഷകള്‍ക്ക് മാറ്റമുണ്ടാകില്ല.പണിമുടക്കുന്ന തൊഴിലാളികള്‍ ഇന്നു രാവിലെ ജില്ലാകേന്ദ്രങ്ങളില്‍ കേന്ദ്ര സര്‍ക്കാര്‍ ഓഫീസുകളിലേക്കു പ്രകടനം നടത്തും. തിരുവനന്തപുരത്ത്‌ രാജ്‌ഭവനിലേക്കാണു മാര്‍ച്ച്‌.