കൊച്ചിയിലെ ആശുപത്രിക്കെതിരെ ശസ്ത്രക്രിയാ പിഴവ് ആരോപണം; പിന്നാലെ ട്രാൻസ് യുവതി ആത്മഹത്യ ചെയ്തു; മരിച്ചത് നിയമസഭാ തെരഞ്ഞെടുപ്പിൽ മത്സരിച്ച ആദ്യ ട്രാൻസ് വനിത

താൻ കടുത്ത സാമ്പത്തിക പ്രതിസന്ധിയിലാണെന്നും അനന്യ പറഞ്ഞിരുന്നു. കേരളത്തിലെ ആദ്യ ട്രാൻസ്ജെൻഡർ റേഡിയോ ജോക്കി കൂടെയാണ് അനന്യ. ഡെമോക്രാറ്റിക് സോഷ്യൽ ജസ്റ്റിസ് പാർട്ടിക്കുവേണ്ടി മലപ്പുറത്തെ വേങ്ങരയിൽ നിന്നാണ് അനന്യ നിയമസഭാ തെരഞ്ഞെടുപ്പിൽ മത്സരിച്ചത്.

"തന്റേത് വിജയകരമായി നടക്കേണ്ട ശസ്ത്രക്രിയ ആയിരുന്നു. കൊല്ലം ജില്ലക്കാരിയായ തനിക്ക് 28 വയസുണ്ട്. കൊച്ചിയിലെ റിനൈ മെഡിസിറ്റിയിൽ നിന്നാണ് താൻ ലിംഗമാറ്റ ശസ്ത്രക്രിയ നടത്തിയത്. ശസ്ത്രക്രിയയിൽ പിഴവുണ്ടായി. അത് ഡോക്ടർ സമ്മതിച്ചിരുന്നു. ഡോ അർജുൻ അശോകനാണ് ലിംഗമാറ്റ ശസ്ത്രക്രിയ നടത്തിയത്. 2020 ജൂൺ 14 നായിരുന്നു ശസ്ത്രക്രിയ. ശസ്ത്രക്രിയ കഴിഞ്ഞിട്ട് ഒരു വർഷമായിട്ടും സമയത്തിനപ്പുറം എഴുന്നേറ്റ് നിൽക്കാനോ ഉറക്കെ തുമ്മാനോ പൊട്ടിക്കരയാനോ കഴിയുന്നില്ല." ഓൺലൈൻ മാധ്യമമായ ദ ക്യൂവിന് നൽകിയ അഭിമുഖത്തിൽ അനന്യ പറഞ്ഞിരുന്നു. തന്നെപ്പോലെ ശസ്ത്രക്രിയ പരാജയപ്പെട്ട് ഗുരുതരമായ അവസ്ഥയിൽ കഴിയുന്ന നിരവധിപ്പേരുണ്ടെന്നും അനന്യ ആരോപിച്ചിരുന്നു. ഇതിനിടെയാണ് മരണം.