വോട്ടർ പട്ടികയിൽ ഭിന്നലിംഗക്കാർക്ക് പേരുകൾ ചേർക്കാൻ അവസരം

കോഴിക്കോട്: പതിനെട്ട് വയസിനു മുകളിലുള്ള ഭിന്നലിംഗക്കാരുടെയും,അംഗപരിമിതരുടെയും പേരുകൽ വോട്ടർ പട്ടികയിൽ ഉള്‍പ്പെടുത്താനുള്ള നടപടി ഈ മാസം 8 ന് ആരംഭിക്കും. ട്രാന്‍സ്‌ജെന്‍ഡേഴ്‌സ്, അംഗപരിമിതര്‍ തുടങ്ങിയവരെ വോട്ടര്‍ പട്ടികയില്‍ ഉള്‍പ്പെടുത്താനുള്ള തെരഞ്ഞെടുപ്പ് കമ്മീഷന്‍ തീരുമാനത്തിന്റെ ഭാഗമായി ട്രാന്‍സ്‌ജെന്‍ഡേഴ്‌സ് പ്രതിനിധികളുടെയും അംഗപരിമിതരുടെ സംഘടനാ പ്രതിനിധികളുടെയും യോഗം കോഴിക്കോട് ജില്ലാ കളക്ടര്‍ യു.വി ജോസിന്റെ അധ്യക്ഷതയില്‍ നടന്നു.

തെരഞ്ഞെടുപ്പില്‍ മുഴുവന്‍ വിഭാഗത്തിന്റെയും പ്രാതിനിത്യം ഉറപ്പു വരുത്തുകയാണ് തെരഞ്ഞെടുപ്പ് കമ്മീഷന്റെ ലക്ഷ്യം. കോഴിക്കോട് ജില്ലയിലാണ് ഇപ്പോൾ പദ്ധതി നടപ്പാക്കുന്നത്. കോഴിക്കോട് താലൂക്ക് പരിധിയില്‍ ഉള്ളവര്‍ കോഴിക്കോട് ടൗണ്‍ഹാളിലും കൊയിലാണ്ടി താലൂക്കിലുള്ളവര്‍ സര്‍ക്കാര്‍ മോര്‍ച്ചറിക്ക് സമീപമുള്ള നെസ്റ്റ് പാലിയേറ്റീവ് കെയറിലും താമരശ്ശേരി, വടകര താലൂക്കിലുള്ളവര്‍ അതാത് താലൂക്ക് ഓഫീസ് ഇലക്ഷന്‍ വിഭാഗത്തിലും എത്തി പേര് ചേര്‍ക്കണം.

ഈ മാസം 8 ന് രാവിലെ 9 മുതല്‍ വൈകിട്ട് 5 വരെ പേര് ചേര്‍ക്കാനുള്ള സൗകര്യം ഉണ്ടായിരിക്കും. താമസം, വയസ്സ് എന്നിവ തെളിയിക്കുന്ന രേഖകളാണ് പേര് ചേര്‍ക്കാന്‍ ആവശ്യം. അംഗപരിമിതര്‍ വൈകല്യം തെളിയിക്കുന്ന രേഖയും ഹാജരാക്കണം. യാത്ര ചെയ്യാന്‍ ബുദ്ധിമുട്ടുള്ള അംഗപരിമിതരുണ്ടെങ്കില്‍ അവരുടെ പ്രതിനിധികള്‍ ബന്ധപ്പെട്ട സ്ഥലങ്ങളിലെത്തി പേര് രജിസ്റ്റര്‍ ചെയ്യണം.

അംഗപരിമിതരെ സുരക്ഷിതമായി വോട്ടിംഗ് കേന്ദ്രത്തിലേക്കും തിരിച്ചും എത്തിക്കാനുള്ള ചുമതല ജില്ലാ ഭരണകൂടത്തിനാണ്. സിസ്റ്റമാറ്റിക് വോട്ടേര്‍സ് എഡുക്കേഷന്‍ ആന്റ് ഇലക്ടറല്‍ പാര്‍ട്ടിസിപ്പേഷന്‍(സീപ്) പദ്ധതിയുടെ ലോഗോ പ്രകാശനവും ടൗണ്‍ഹാളില്‍ നടക്കുന്ന ചടങ്ങങ്ങില്‍ ട്രാന്‍സ്‌ജെന്‍ഡര്‍ സിനിമാതാരം അജ്ഞലി അമീര്‍ നിര്‍വഹിക്കും.