ഇടുക്കി അണക്കെട്ട് തുറന്നു

ഇടുക്കി: ഇടുക്കി ചെറുതോണി അണക്കെട്ട് തുറന്നു. നാല് മണിക്കൂര്‍ നേരത്തേക്ക് ഡാമിന്‍റെ മൂന്നാമത്തെ ഷട്ടര്‍ തുറക്കും. സെക്കന്‍ഡില്‍ 50000 ലിറ്റര്‍ ജലമാണ് തുറന്നുവിടുന്നത്.

ചരിത്രത്തില്‍ മൂന്നു തവണ മാത്രമാണ് ഇടുക്കി അണക്കെട്ട് തുറന്നിട്ടുള്ളത്. 1981, 1992 വര്‍ഷങ്ങളിലാണ് മുന്‍പ് ഡാം തുറന്നത്.

ഇടമലയാര്‍ ഡാമിലെ ജലനിരപ്പ് നിയന്ത്രണവിധേയമാക്കിയശേഷം മാത്രമേ ഇടുക്കി ഡാം മുഴുവനായും തുറക്കു. അല്ലാത്ത പക്ഷം പെരിയാര്‍ അത്രയും വെള്ളം ഉള്‍ക്കൊള്ളില്ല, കെ.എസ്.ഇ.ബി ചെയര്‍മാന്‍ എന്‍.എസ്‍ പിള്ള പറഞ്ഞു. കെ.എസ്.ഇ.ബി പൂര്‍ണമായും സജ്ജമായെന്നും അദ്ദേഹം അറിയിച്ചു.

രാവിലെ മുഖ്യമന്ത്രിയുടെ നേതൃത്വത്തിൽ ചേര്‍ന്ന ഉന്നതതല യോഗത്തിലാണ് തീരുമാനം. നിലവിൽ 2398.80 അടിയാണ് ഡാമിലെ ജലനിരപ്പ്. പ്രദേശത്തുള്ള ജനങ്ങള്‍ക്ക് മുന്നറിയിപ്പ് നല്‍കാൻ കെഎസ്ഇബി ഇടുക്കി ജില്ലാ കളക്ടര്‍ക്ക് നിര്‍ദേശം നല്‍കി.

ഡാമിൻ്റെ മധ്യഭാഗത്തുള്ള ഷട്ടറാണ് 50 സെ.മി. ഉയർത്തുക. സെക്കൻഡിൽ 50000 ലിറ്റർ വെള്ളമാണ് പുറത്തേയ്ക്ക് ഒഴുകുക.

ഇന്നു രാവിലെ 5 മണിയോടെ ഇടമലയാർ ഡാമിൻ്റെ ഷട്ടറുകൾ ഉയർത്തിയതിനെത്തുടർന്ന് കുട്ടമ്പുഴയുടെ പരിസരപ്രദേശങ്ങളിൽ വീടുകളിൽ വെള്ളം കയറിയിട്ടുണ്ട്. ഒന്നോ രണ്ടോ മണിക്കൂറുകൾക്കകം ഈ ജലം ആലുവയിലെത്തും. ഇടുക്കി ഡാമിൽ നിന്നുള്ള വെള്ളം കൂടി എത്തുന്നതോടെ ജലനിലപ്പ് വീണ്ടും ഉയരാനാണ് സാധ്യത.