ജനുവരിയില്‍ ശബരിമല കയറുമെന്ന് തൃപ്തി ദേശായി

ജനുവരിയില്‍ ശബരിമലയിൽ പ്രവേശിക്കാന്‍ ശ്രമിക്കുമെന്ന് തൃപ്തി ദേശായി. നിയമ പോരാട്ടത്തിനൊടുവില്‍ മുംബൈയിലെ ഹാജി അലി ദര്‍ഗയില്‍ പ്രവേശിച്ചതിന് പിന്നാലെയാണ് അടുത്തലക്ഷ്യം ശബരിമലയാണെന്ന് തൃപ്തി ദേശായി വെളിപ്പെടുത്തി.

അതേ സമയം സ്ത്രീകളെ മുന്‍നിര്‍ത്തി തൃപ്തി ദേശായിയെ തടയുമെന്ന് രാഹുല്‍ ഈശ്വറും, തൃപ്തിയുടെ പ്രഖ്യാപനത്തെ ദേവസ്വം ബോര്‍ഡ് ഭീഷണിയായി കാണുന്നില്ലെന്ന് പ്രസിഡന്റ് പ്രയാര്‍ ഗോപാലകൃഷ്ണനും പറഞ്ഞു.

ശബരിമലയില്‍ സ്ത്രീകള്‍ക്കും ആരാധനയ്ക്ക് അവകാശമുണ്ട്. തങ്ങള്‍ സംഘര്‍ഷമുണ്ടാക്കാനല്ല വരുന്നത്. തങ്ങള്‍ക്കൊപ്പമുളള എല്ലാ സ്ത്രീകളുടെയും അടുത്ത ലക്ഷ്യം ശബരിമലയാണ്. അതിനായി ജനുവരിയില്‍ എത്തുമെന്നാണ് തൃപ്തി ദേശായി ഇന്ന് പറഞ്ഞത്. ആചാരപ്രകാരമുളള വിലക്ക് ശബരിമലയില്‍ തുടരും. ഇക്കാര്യത്തില്‍ അന്തിമതീരുമാനം സുപ്രീംകോടതി സ്വീകരിക്കുമെന്നും പ്രയാര്‍ പറഞ്ഞു. തൃപ്തി ദേശായി വ്യാജ ഫെമിനിസ്റ്റാണ്. സ്ത്രീകളെ മുന്‍നിര്‍ത്തി തന്നെ അവരെ തടയുമെന്നും ശബരിമലയില്‍ അവരെ പ്രവേശിപ്പിക്കില്ലെന്ന് രാഹുല്‍ ഈശ്വറും വ്യക്തമാക്കി.