തെച്ചിക്കോട്ട്കാവ് രാമചന്ദ്രന്‍റെ വിഷയത്തിൽ വിധി നടപ്പാക്കുമെന്ന് കളക്ടർ

തൃശൂർ: തൃശൂർ പൂരത്തിന് തെച്ചിക്കോട്ട്കാവ് രാമചന്ദ്രനെ എഴുന്നള്ളിക്കുന്നത് സംബന്ധിച്ച തീരുമാനം കോടതി ഉത്തരവിന്റെ അടിസ്ഥാനത്തിലായിരിക്കുമെന്ന് തൃശൂർ ജില്ലാ കളക്ടർ ടി.വി അനുപമ. മെയ് 12, 13, 14 ദിവസങ്ങളിൽ ആനകൾക്ക് തൃശൂർ ടൗണിൽ വിലക്കുണ്ട്. മദപ്പാടുള്ളവ, നീരുളളവ, വെടിക്കെട്ട് നടക്കുമ്പോൾ വിരണ്ടോടുന്നവ എന്നിവക്കാണ് വിലക്കേർപ്പെടുത്തിയിരിക്കുന്നത്.

തെച്ചിക്കോട്ട്കാവ് രാമചന്ദ്രനെ പൂരത്തിന് എഴുന്നള്ളിക്കുമോ എന്ന മാധ്യമപ്രവർത്തകരുടെ ചോദ്യത്തിന് കോടതിയുടെ പരിഗണനയിലിരിക്കുന്ന വിഷയത്തിൽ മറുപടി പറയാനില്ലെന്ന് കളക്ടർ അനുപമ വ്യക്തമാക്കി. വിഷയത്തിൽ കോടതി ഉത്തരവ് നടപ്പാക്കുമെന്നും കളക്ടർ വ്യക്തമാക്കി.ചില ആനകളെ എഴുന്നള്ളിക്കുന്നത് നിരോധിച്ചിട്ടുണ്ടെന്നും ആ നിരോധനം പിൻവലിച്ചിട്ടില്ലെന്നും കളക്ടർ വ്യക്തമാക്കി.

തൃശൂർ പൂരത്തിന്റെ ഒരുക്കങ്ങൾ വിശദീകരിക്കുന്നതിനിടെയാണ് കളക്ടർ ടി.വി അനുപമ ആനകളുടെ കാര്യം വിശദീകരിച്ചത്. ഡ്രോണുകള്‍, ഹെലി ക്യാം, ലേസര്‍ ലൈറ്റുകള്‍ എന്നിവ തൃശ്ശൂര്‍ കോര്‍പ്പറേഷന്‍ പരിധിയില്‍ നിരോധിച്ചിട്ടുണ്ട്. കാഴ്ച മറയ്ക്കുന്ന ട്യൂബ് ബലൂണുകള്‍ക്കും നിരോധനം ഏർപ്പെടുത്തിയിട്ടുണ്ട്. പൂരത്തിനെത്തുന്നവർ തോൾ ബാഗ് ഒഴിവാക്കണമെന്നും നിർദേശമുണ്ട്.