മണ്ഡലസീസണില്‍ ശബരിമല കയറുമെന്ന് തൃപ്തി ദേശായി

മുംബൈ: സുപ്രീം കോടതി വിധിയുടെ പശ്ചാത്തലത്തില്‍ ഉടന്‍ ശബരിമലയിലെത്തുമെന്ന് ഭൂമാതാ ബ്രിഗേഡ് നേതാവ് തൃപ്തി ദേശായി. ഈ മണ്ഡലകാല സീസണില്‍ തന്നെ ശബരിമല ദര്‍ശനം നടത്തും. തീയതി ഉടന്‍ തീരുമാനിക്കും ശബരിമലയില്‍ എത്തുന്ന സ്ത്രീകളെ എല്ലാവരും സ്വാഗതം ചെയ്യുകയാണ് വേണ്ടതെന്നും അവര്‍ വ്യക്തമാക്കി. മാതൃഭൂമി ന്യൂസിന് നല്‍കിയ അഭിമുഖത്തിലാണ് തൃപ്തി ഇക്കാര്യം അറിയിച്ചത്.

സുപ്രീം കോടതി വിധിയില്‍ ഏറെ സന്തോഷമുണ്ട്. സ്തീകള്‍ക്ക് അവരുടെ അവകാശങ്ങള്‍ ലഭിച്ചെന്നും ഒരു കൂട്ടം സ്ത്രീകള്‍ക്കൊപ്പമാണ് താനെത്തുകയെന്നും തൃപ്തി വ്യക്തമാക്കി. സുപ്രീംകോടതി വിധിക്കെതിരെ ഇപ്പോള്‍ കേരളത്തില്‍ നടക്കുന്നത് അനാവശ്യ പ്രതിഷേധങ്ങളാണെന്ന് തൃപ്തി ദേശായി പറഞ്ഞു. അയ്യപ്പ ഭക്തരുടേയും മതനേതാക്കളുടേയും ഭാഗം കേട്ട ശേഷമാണ് വിധി വന്നിരിക്കുന്നത്. വിധിക്കെതിരായ സമരം കോടതിയലക്ഷ്യമാണെന്നും തൃപ്തി കൂട്ടിച്ചേര്‍ത്തു.