വിവാദങ്ങള്‍ക്കൊടുവിൽ തൃപ്‌തിയും സംഘവും മടങ്ങി

കൊച്ചി: ഒരു ദിനം മുഴുവൻ നിറഞ്ഞുനിന്ന വിവാദങ്ങള്‍ക്കൊടുവിൽ ശബരിമല ദര്‍ശനം നടത്താനെത്തിയ ഭൂമാതാ ബ്രിഗേഡ് നേതാവ് തൃപ്തി ദേശായിയും സംഘവും തിരികെ മടങ്ങി. വെള്ളിയാഴ്ച രാത്രി 9.25ന്‍റെ എയര്‍ ഇന്ത്യ 55 വിമാനത്തിലാണ് മുംബൈയിലേക്ക് മടങ്ങിയത്.

ശബരിമലയിൽ ദര്‍ശനത്തിനായെത്തിയ തൃപ്തി ദേശായിയെ നെടുമ്പാശേരി വിമാനത്താവളത്തില്‍ നിന്ന് പുറത്തിറങ്ങാന്‍ അനുവദിക്കാതെ ആര്‍എസ്‌എസ്-ബിജെപി പ്രവര്‍ത്തകര്‍ പ്രതിഷേധവുമായി തടഞ്ഞിരുന്നു. ഇതേ തുടര്‍ന്ന് 14 മണിക്കൂറോളം തൃപ്‌തിക്കും സംഘത്തിനും വിമാനത്താവളത്തിനുള്ളില്‍ കഴിയേണ്ട സ്ഥിതിയായിരുന്നു. തുടര്‍ന്ന് ക്രമസമാധാന പ്രശ്‌നം ഒഴിവാക്കുന്നതിനായി പൊലീസിന്റെ നിര്‍ദേശം മാനിച്ചാണ് താന്‍ മടങ്ങുന്നതെന്ന് തൃപ്തി അറിയിച്ചു.

പക്ഷേ മുൻ കൂട്ടി അറിയിക്കാതെ ശബരിമല സന്ദര്‍ശനത്തിനായി കൂടുതല്‍ സന്നാഹങ്ങളുമായി വീണ്ടും കേരളത്തിലെത്തുമെന്ന് തൃപ്തി ദേശായി മാധ്യമങ്ങളോട് പറഞ്ഞിട്ടുണ്ട്. .