ആപ്പ്ജില്ല

ദര്‍ശനം നടത്താതെ മടങ്ങില്ല; നിലപാടിലുറച്ച് തൃപ്തി ദേശായി

എന്തൊക്കെ സംഭവിച്ചാലും ശബരിമലയിലെത്തി അയ്യപ്പദര്‍ശനം നടത്തിയേ മടങ്ങൂവെന്ന് തൃപ്തി ദേശായി

Samayam Malayalam 16 Nov 2018, 12:44 pm
കൊച്ചി: ശബരിമല സന്ദര്‍ശന വിഷയത്തില്‍ നിലപാടിലുറച്ച് ഭൂമാതാ ബ്രിഗേഡ് നേതാവ് തൃപ്തി ദേശായി. എന്തൊക്കെ സംഭവിച്ചാലും ശബരിമലയിലെത്തി അയ്യപ്പദര്‍ശനം നടത്തിയേ മടങ്ങൂവെന്ന് തൃപ്തി ദേശായി വ്യക്തമാക്കി. സുരക്ഷ നല്‍കുമെന്ന് പൊലീസ് അറിയിച്ചിട്ടുണ്ടെന്നും തൃപ്തി പറഞ്ഞു.കൊച്ചിയില്‍ വിമാനമിറങ്ങിയ ശേഷം മാധ്യമപ്രവര്‍ത്തകരോട് സംസാരിക്കുകയായിരുന്നു അവര്‍.
Samayam Malayalam TRUPTI DESAI


ശബരിമല ദര്‍ശനത്തിനായി വനിതാവകാശ പ്രവര്‍ത്തക കൂടിയായ തൃപ്തി ദേശായിയും സംഘവും പുലര്‍ച്ചെ 4.30ന് ഇന്‍ഡിഗോ വിമാനത്തിലാണ് കൊച്ചിയിലെത്തിയത്. ആറംഗ സംഘത്തിനൊപ്പമാണ് തൃപ്തി കൊച്ചി അന്താരാഷ്ട്ര വിമാനത്താവളത്തിലെത്തിയിരിക്കുന്നത്. ഇവരെ തടയാന്‍ ബി.ജെ.പി പ്രവര്‍ത്തകര്‍ കനത്ത പ്രതിഷേധവുമായി വിമാനത്താവളത്തിന് മുന്നില്‍ തമ്പടിച്ച സാഹചര്യത്തിലാണ് തൃപ്തി നിലപാട് വ്യക്തമാക്കിയത്.

ബി.ജെ.പി ജില്ലാ സെക്രട്ടറി എം.എന്‍ ഗോപിയുടെ നേതൃത്വത്തിലാണ് ബി.ജെ.പി പ്രവര്‍ത്തകര്‍ വിമാനത്താവളത്തിന് മുന്നിൽ പ്രതിഷേധിക്കുന്നത്. സ്ത്രീകളടക്കമുള്ള വലിയ സംഘമാണ് വിമാനത്താവളത്തിന് പുറത്ത് പ്രതിഷേധിക്കുന്നത്. വിശ്വാസികൾ ശരണം വിളിച്ചാണ് പ്രതിഷേധിക്കുന്നത്. നിരന്തരം പ്രതിഷേധക്കാരുടെ എണ്ണം കൂടുകയാണ്. സ്ഥലത്ത് വന്‍ പൊലീസ് സന്നാഹം നിലയുറപ്പിച്ചിട്ടുണ്ട്.


തൃപ്തി ദേശായിക്ക് എയര്‍പോര്‍ട്ടിന് പുറത്തുപോകാന്‍ വാഹനം നല്‍കില്ലെന്ന നിലപാടിലാണ് ടാക്സി ഡ്രൈവര്‍മാര്‍. പ്രതിഷേധക്കാർ വാഹനം തകർത്തേക്കുമെന്നും നിലവിൽ ഇത്തരത്തിൽ ആക്രമണം നേരിട്ട വാഹനത്തിന് മേൽ യാതൊരു ഉത്തരവാദിത്തവും ആരും ഏറ്റെടുത്തിട്ടില്ലെന്നും ഡ്രൈവർമാർ പറഞ്ഞു. ഓൺലൈൻ ടാക്സി ഡ്രൈവർമാരും ഇതേ നിലപാടിലാണ്. ഇനി പോലീസിൻ്റെ നേതൃത്വത്തിൽ മാത്രമേ തൃപ്തി ദേശായിയ്ക്ക് വിമാനത്താവളത്തിന് പുറത്തെത്താൻ കഴിയുകയുള്ളൂ.

ആര്‍ട്ടിക്കിള്‍ ഷോ

Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക്പേജ് ലൈക്ക് ചെയ്യൂ
ട്രെൻഡിങ്