തൃശൂര്‍ ജില്ലാ കളക്ടര്‍ സ്ഥാനത്തു നിന്ന് ടി വി അനുപമയെ മാറ്റി

തൃശൂര്‍: തൃശൂര്‍ കളക്ടര്‍ സ്ഥാനത്തുനിന്ന് ടി വി അനുപമയെ മാറ്റി. പുതിയ കളക്ടറായി സി ഷാനവാസിനെ നിയമിക്കാൻ ഇന്ന് ചേര്‍ന്ന മന്ത്രിസഭാ യോഗം തീരുമാനിച്ചു. അവധി ആവശ്യപ്പെട്ട് ടി വി അനുപമ അപേക്ഷ നൽകിയ സാഹചര്യത്തിലാണ് പുതിയ നിയമനം.

2010 ബാച്ചിലെ ഐഎഎസ് ഉദ്യോഗസ്ഥയാണ് ടി വി അനുപമ. 2018 ജൂണിലാണ് തൃശൂര്‍ ജില്ലാ കളക്ടറായി ടി വി അനപമ ചുമതലയേറ്റത്. ആലപ്പുഴ ജില്ലാ കളക്ടര്‍ സ്ഥാനത്തുനിന്നാണ് തൃശൂരിലേക്ക് അനുപമ എത്തുന്നത്. അവധിക്കുശേഷം തുടര്‍ പരിശീലനത്തിനായി മുസ്സോറിയിലെ ദേശീയ അക്കാദമയിലേക്ക് പോകും.

ആലപ്പുഴയിൽ തോമസ് ചാണ്ടിക്കെതിരെ നടത്തിയ പോരാട്ടത്തിൽ ടി വി അനുപമ ജനശ്രദ്ധ നേടിയെടുത്തിരുന്നു. പ്രളയ സമയത്തെ ടി വി അനുപമയുടെ പ്രവര്‍ത്തനങ്ങളും പ്രശംസ പിടിച്ചു പറ്റിയതായിരുന്നു. അതേസമയം തൃശൂര്‍ പൂരത്തിന് തെച്ചിക്കോട് രാമചന്ദ്രനെ എഴുന്നള്ളിക്കുന്നതുമായി ബന്ധപ്പെട്ട വിഷയത്തിൽ ആനപ്രേമികളുടെ എതിര്‍പ്പ് ടി വി അനുപമ നേരിട്ടിരുന്നു.