തിരുവനന്തപുരം: പൂജപ്പുര സബ് ജയിലിലെ 20 ജീവനക്കാരെ കൊവിഡ് സംശയത്തിന്റെ അടിസ്ഥാനത്തില് നിരീക്ഷണത്തില് പ്രവേശിപ്പിക്കാന് തീരുമാനം. സബ് ജയിലിലെ റിമാന്ഡ് തടവുകാരന് കൊവിഡ് 19 സ്ഥിരീകരിച്ചതോടെയാണ് ജയിലിലെ ജീവനക്കാരെ നിരീക്ഷണത്തില് പ്രവേശിപ്പിക്കുന്നത്. ഇന്നാണ് തടവുകാരന്റെ പരിശോധനാ ഫലം പുറത്ത് വന്നത്.
തടവുകാരനുമായി ജയിലില് അടുത്ത് ഇടപഴകിയ ഇരുപതോളം ഉദ്യോഗസ്ഥരോടാണ് നിരീക്ഷണത്തില് കഴിയാന് നിര്ദ്ദേശിച്ചിരിക്കുന്നത്. ജയിലില് ഞായറാഴ്ച ഡ്യൂട്ടിയിലുണ്ടായിരുന്ന പതിനാല് ജീവനക്കാര് ജയിലില് തന്നെ നിരീക്ഷണത്തില് തുടരും. അതേസമയം ഡ്യൂട്ടി കഴിഞ്ഞ് പുറത്തുപോയ ജീവനക്കാര് വീട്ടില് തന്നെ നിരീക്ഷണത്തില് കഴിയണമെന്നും നിര്ദേശം നല്കിയിട്ടുണ്ട്.
Also Read: കേരളത്തില് കൊവിഡ് കേസുകള് ഇനിയും ഉയരും; മുന്നറിയിപ്പുമായി ആരോഗ്യമന്ത്രി
അബ്കാരി കേസില് ശനിയാഴ്ചയാണ് ഇയാളെ വെഞ്ഞാറമൂട് പൊലീസ് അറസ്റ്റ് ചെയ്തത്. പിന്നാലെ കോടതി റിമാന്ഡ് ചെയ്തു. പ്രതികളെ റിമാന്ഡ് ചെയ്യുന്നതിന് മുമ്പ് കൊവിഡ് പരിശോധന നടത്തണമെന്ന നിര്ദേശത്തിന്റെ അടിസ്ഥാനത്തില് ഇയാള്ക്ക് ഇന്നലെ പരിശോധന നടത്തിയിരുന്നു. ഈ പരിശോധനയിലാണ് ഇയാള്ക്ക് കൊവിഡ് സ്ഥിരീകരിച്ചത്. സംസ്ഥാനത്ത് ആദ്യമായാണ് ഒരു തടവുകാരന് കൊവിഡ് സ്ഥിരീകരിച്ചിരിക്കുന്നത്.