കിണര്‍ വൃത്തിയാക്കുന്നതിനിടെ രണ്ടുപേര്‍ ശ്വാസം മുട്ടി മരിച്ചു

ആലപ്പുഴ: മണ്ണഞ്ചേരിയിൽ കിണര്‍ വൃത്തിയാക്കുന്നതിനിടെ രണ്ടുപേര്‍ ശ്വാസം മുട്ടി മരിച്ചു. മുഹമ്മ സ്വദേശി അമല്‍, കണിച്ചുകുളങ്ങര സ്വദേശി ഗിരീഷ് എന്നിവരാണ് കിണറിനുള്ളിൽ കുടുങ്ങി മരിച്ചത്. പരിക്കേറ്റ രണ്ട് പേരെ സമീപത്തുള്ള സ്വകാര്യ ആശുപത്രിയില്‍ പ്രവേശിപ്പിച്ചിരിക്കുകയാണ്. മണ്ണഞ്ചേരി അമ്പലക്കടവ് കുമ്മായക്കമ്പനി വളപ്പിലെ ചെറിയ കിണറിലെ ചെളി നീക്കി ആഴം കൂട്ടാനാണ് ഇവര്‍ കിണറിലിറങ്ങിയത്.

എന്നാൽ ഓക്സിജന്‍ കുറഞ്ഞ വായു ശ്വസിച്ചതോടെ ഇരുവരും തളര്‍ന്ന് കിണറിലെ ചെളിയില്‍ കുടുങ്ങുകയായിരുന്നു. ഇവരെ രക്ഷിക്കാനായി മഹേഷ്, ജിത്തു എന്നിവര്‍ കിണറ്റിലിറങ്ങിയെങ്കിലും ഇവര്‍ക്കും ഇതേ അവസ്ഥയായി. വിവരമറിഞ്ഞെത്തിയ നാട്ടുകാര്‍ മഹേഷിനെയും ജിത്തുവിനെയും രക്ഷിച്ച് അടുത്തുള്ള സ്വകാര്യ ആശുപത്രിയില്‍ പ്രവേശിപ്പിച്ചു. ഫയര്‍ഫോഴ്സ് സ്ഥലത്തെത്തി അമലിന്‍റെയും ഗിരീഷിന്‍റെയും മൃതദേഹങ്ങള്‍ പുറത്തെടുത്തു.