ലിംഗമാറ്റ ശസ്ത്രക്രിയക്ക് രണ്ട് ലക്ഷം രൂപ വീതം സഹായം

തിരുവനന്തപുരം: ശസ്‌ത്രക്രിയക്ക്‌ വിധേയരായ ട്രാൻസ്‌ജെൻഡർ വിഭാഗത്തിൽപ്പെട്ടവർക്ക് ധനസഹായം നൽകുമെന്ന് ആരോഗ്യവകുപ്പ് മന്ത്രി കെ.കെ.ശൈലജ. ശസ്ത്രക്രിയ നടത്തുന്ന അർഹരായവരിൽ നിന്ന് അപേക്ഷ ക്ഷണിച്ച് 2 ലക്ഷം രൂപ വരെ നൽകും. ഇതിനായി 20 ലക്ഷം രൂപയുടെ ഭരണാനുമതി നൽകിയതായി ആരോഗ്യവകുപ്പ് മന്ത്രി പറഞ്ഞു.

ട്രാൻസ്‌ജെൻഡർ വ്യക്തികളെ സമൂഹത്തിന്റെ മുഖ്യധാരയിലേക്ക് എത്തിക്കുക എന്നതാണ് സർക്കാർ ലക്ഷ്യം. അർഹതപ്പെട്ട 10 പേർക്കാണ് പദ്ധതിയുടെ ആദ്യഘട്ടത്തിൽ പണം നൽകുന്നത്. ട്രാൻസ്‌ജെൻഡറുകൾക്ക് സ്വയം തൊഴിൽ സംരംഭം ആരംഭിക്കാൻ മൂന്ന് ലക്ഷം രൂപ വരെ അനുവദിക്കുന്ന പദ്ധതി നടപ്പിലാക്കിയിരുന്നു.കേരളത്തിലാണ് ഇന്ത്യയിൽ ആദ്യമായി ട്രാൻസ്‌ജെൻഡർ പോളിസി നടപ്പാക്കിയത്. അവരുടെ ഉന്നമനത്തിനായി വ്യക്തിഗത ക്ഷേമപദ്ധതികൾ ആവിഷ്‌കരിച്ചിട്ടുണ്ടെന്നും മന്ത്രി വ്യക്തമാക്കി. ലിംഗമാറ്റ ശസ്ത്രക്രിയയിലൂടെ ട്രാൻസ്‌ജെൻഡറുകൾ അനുഭവിക്കുന്ന മാനസിക പ്രതിസന്ധിക്ക് ഒരു പരിധി വരെ പരിഹാരം കാണാൻ സാധിക്കും.