ഇടമലയാറിലെ രണ്ട് ഷട്ടറുകള്‍ വൈകീട്ട് അടച്ചേക്കും

കോതമംഗലം: ഇടമലയാര്‍ അണക്കെട്ടിലെ ജലനിരപ്പ് താഴ്ന്ന സാഹചര്യത്തില്‍ ഡാമിന്‍റെ രണ്ട് ഷട്ടറുകള്‍ ഇന്ന് വൈകുന്നേരത്തോടെ തുറന്നേക്കും. 169 മീറ്റര്‍ പരമാവധി സംഭരണശേഷിയുള്ള ഡാമില്‍ 168.26 മീറ്ററാണ് ഇന്ന് രാവിലെ രേഖപ്പെടുത്തിയ ജലനിരപ്പ്. നിലവില്‍ ഡാമിന്‍റെ നാല് ഷട്ടറുകളും തുറന്നിരിക്കുകയാണ്.

അണക്കെട്ടിന്‍റെ രണ്ട് ഷട്ടറുകള്‍ ഒരു മീറ്റര്‍ വീതവും രണ്ടെണ്ണം അര മീറ്റര്‍ വീതവുമാണ് ഇപ്പോള്‍ തുറന്നിരിക്കുന്നത്. ഇതില്‍ രണ്ടെണ്ണം അടയ്ക്കാനാണ് കെഎസ്ഇബി ആലോചിക്കുന്നത്. വൃഷ്ടി പ്രദേശത്ത് മഴ കുറഞ്ഞതും തമിഴ്നാട്ടിലെ നീരാര്‍ ഡാമില്‍ നിന്നുള്ള ജലത്തിന്‍റെ അളവ് കുറഞ്ഞതുമാണ് ഡാമിലെ ജലനിരപ്പ് കുറയാന്‍ ഇടയാക്കിയത്.