രണ്ടു വിദ്യാർഥികൾ ഒഴുക്കിൽപ്പെട്ട് മരിച്ചു: മരണം 22 ആയി

കൊച്ചി: കനത്തമഴ സംസ്ഥാനത്ത് നാശനഷ്ടം വിതക്കുന്നതിനിടെ മരണം 22 ആയി. മണ്ണൂർ ഐരാപുരത്ത് രണ്ടു വിദ്യാർഥികൾ ഒഴുക്കിൽപ്പെട്ട് മരിച്ചതോടെയാണ് മരണ നിരക്ക് ഉയർന്നത്. കീഴില്ലം സെന്‍റ് തോമസ് സ്‌കൂളിലെ വിദ്യാർഥികളായ അലൻ തോമസ്, ഗോപീകൃഷ്ണൻ എന്നിവരാണ് ഒഴുക്കിൽപ്പെട്ട് മരിച്ചത്.

ഇരുവരും സെന്‍റ് തോമസ് സ്‌കൂളിലെ പ്ലസ് ടൂ വിദ്യാർഥികളാണ്. കനത്തമഴയിൽ മീൻ പിടിക്കുന്നതിനിടെയാണ് ഇരുവരും ഒഴുക്കിൽപ്പെട്ടതെന്നാണ് പ്രാഥമിക വിവരം. ഇടുക്കി, ഇടമലയാർ ഡാമുകൾ തുറന്നു വിട്ടതിനാൽ എറണാകുളം ജില്ലയിലെ 951 പേരെ ദുരിതാശ്വാസ ക്യാമ്പിലേക്ക് മാറ്റി. അതിനിടെ, ചെറുതോണി ഡാമിന്‍റെ ഷട്ടറുകൾ ഉയർത്തിയതിനാൽ ചെറുതോണി പാലം വഴിയുള്ള ഗതാഗതം നിർത്തിവെച്ചു. സംസ്ഥാനത്ത് മുൻപെങ്ങും ഉണ്ടാകാത്ത രീതിയിലുള്ള അതീവ ഗുരുതരസാഹചര്യമാണ് ഇപ്പോൾ ഉള്ളതെന്ന് മുഖ്യമന്ത്രി പിണ റായി വിജയൻ വാർത്താസമ്മേളനത്തിൽ അറിയിച്ചു. സംസ്ഥാനത്ത് ഇത് വരെ 22 ഡാമുകൾ തുറന്നു വിട്ടു. വരും ദിവസങ്ങളിൽ കൂടുതൽ ഡാമുകൾ തുറക്കാനാണ് സാധ്യത.