കോഴിക്കോട്: മാവോയിസ്റ്റ് ബന്ധം ആരോപിച്ച് യുഎപിഎ ചുമത്തി പോലീസ് അറസ്റ്റ് ചെയ്‍ത അലന്‍ ഷുഹൈബിന് സിപിഎം നിയമസഹായം നല്‍കും. സിപിഎം കോഴിക്കോട് പന്നിയങ്കര ലോക്കല്‍ കമ്മിറ്റിയാണ് അലന് നിയമസഹായം നല്‍കാനുള്ള തീരുമാനമെടുത്തത്.

പോലീസ് നടപടിയെ വിമര്‍ശിച്ച് സിപിഎം സൗത്ത് ഏറിയാ കമ്മിറ്റി പ്രമേശം പാസാക്കിയതിന് പിന്നാലെയാണ് അലന് നിയമസഹായം നല്‍കാന്‍ പന്നിയങ്കര ലോക്കല്‍ കമ്മിറ്റി തീരുമാനിച്ചത്.

സിപിഎം പ്രവര്‍ത്തകരായ അലന്‍ ഷുഹൈബിനെയും താഹ ഫസലിനെയും അറസ്റ്റ് ചെയ്‍ത സംഭവത്തില്‍ വ്യാപക പ്രതിഷേധമാണ് ഉയരുന്നത്. സിപിഎമ്മില്‍ നിന്നുള്‍പ്പെടെ നിരവധിയാളുകള്‍ അറസ്റ്റിനെ വിമര്‍ശിച്ച് രംഗത്തെത്തി.

Also Read മാവോയിസ്റ്റ് അറസ്റ്റില്‍ പിണറായി 2015-ല്‍ പറഞ്ഞത്; സമൂഹ മാധ്യമങ്ങളില്‍ ചര്‍ച്ചയായി പഴയ ഫേസ്ബുക്ക് പോസ്റ്റ്

അതേസമയം, അലനെയും താഹയെയും വിയ്യൂര്‍ ജയിലിലേക്ക് മാറ്റാനുള്ള തീരുമാനം മാറ്റി. ഇരുവരും കോഴിക്കോട് ജയിലില്‍ തന്നെ തുടരും. രണ്ടുപേരുടെയും ജാമ്യാപേക്ഷ തിങ്കളാഴ്‍ച പരിഗണിക്കുന്നതിനാലാണ് ജയില്‍ മാറ്റം ഇപ്പോള്‍ വേണ്ടെന്ന് തീരുമാനിച്ചത്. ജാമ്യാപേക്ഷ കോടതി നിരസിച്ചാല്‍ ഇരുവരെയും വിയ്യൂരിലേക്ക് മാറ്റും.

അലനെയും താഹയെയും വിയ്യൂരിലേക്ക് മാറ്റുമെന്ന് അറിയിച്ചതിനാല്‍ രക്ഷിതാക്കള്‍ വസ്ത്രങ്ങളുമായി രാവിലെ ജയിലിലെത്തിയിരുന്നു. മാറ്റില്ലെന്ന് അറിയിച്ചതോടെ രക്ഷിതാക്കള്‍ മടങ്ങി.

വെള്ളിയാഴ്‍ച വൈകീട്ട് ആറുമണിയോടെയാണ് സിപിഎം പന്തീരാങ്കാവ് ബ്രാഞ്ച് കമ്മിറ്റി അംഗങ്ങളായ അലന്‍ ഷുഹൈബിനെയും താഹ ഫസലിനെയും യുഎപിഎ ചുമത്തി പോലീസ് അറസ്റ്റ് ചെയ്‍തത്.