യൂബർ- ഓട്ടോ പ്രശ്‌നം: രമ്യതയോടെ പോകാൻ ധാരണ

കൊച്ചി: കൊച്ചി നഗരത്തിൽ യൂബർ ടാക്‌സിയുമായുള്ള വിഷയത്തിൽ രമ്യതയോടെ മുന്നോട്ടുപോകാൻ ജില്ലാ കളക്ടർ മുഹമ്മദ് വൈ. സഫീറുള്ള വിളിച്ചുചേർത്ത യോഗത്തിൽ ധാരണയായി. ക്രിസ്മസ്, ഉത്‌സവകാലമായതിനാൽ ആയിരക്കണക്കിനു ടൂറിസ്റ്റുകൾ നഗരത്തിൽ അടുത്ത രണ്ടാഴ്ചയ്ക്കുള്ളിൽ എത്തും. ഇവർക്ക് ബുദ്ധിമുട്ട് സൃഷ്ടിക്കാത്ത രീതിയിൽ പ്രവർത്തിക്കാൻ ഇരുകൂട്ടരോടും കളക്ടർ നിർദേശിച്ചു.

പ്രശ്‌നങ്ങൾ ഒരുകാരണവശാലും ക്രമസമാധാനം ലംഘിക്കുന്ന രീതിയിൽ പോകാൻ അനുവദിക്കരുത്. മാത്രമല്ല, യാത്രക്കാരോട് മാന്യമായി പെരുമാറുകയും ചെയ്യണം. ഇപ്പോഴുള്ള വിഷയങ്ങൾ രമ്യതയോടെ കണ്ടില്ലെങ്കിൽ ടൂറിസത്തെയായിരിക്കും അത് ഏറെ ബാധിക്കുക. അങ്ങനെ വരുമ്പോൾ അതു രണ്ടുകൂട്ടർക്കും ഗുണം ചെയ്യില്ലെന്ന് കളക്ടർ വ്യക്തമാക്കി. ഇതു സംബന്ധിച്ചു നിലനിൽക്കുന്ന നിയമപരവും അല്ലാത്തതുമായ വിഷയങ്ങൾ സർക്കാരിന്റെ ശ്രദ്ധയിൽക്കൊണ്ടുവരുമെന്നും റിപ്പോർട്ട് സമർപ്പിക്കുമെന്നും ജില്ലാ കളക്ടർ അറിയിച്ചു.

പരമ്പരാഗത തൊഴിലാളികളുടെ തൊഴിൽ സംരക്ഷണം ഉൾപ്പെടെയുള്ള കാര്യങ്ങൾ സർക്കാരിന്റെ ശ്രദ്ധയിൽകൊണ്ടുവരും. നിലവിലുള്ള നിയമങ്ങളും കോടതി ഉത്തരവുകളും പാലിക്കാൻ ഇരുകൂട്ടരും തയാറാകണമെന്ന് അദ്ദേഹം നിർദേശിച്ചു. യോഗത്തിൽ എഡി എം സി. കെ. പ്രകാശ്, ആർടിഒ പി. എച്ച് സാദിഖ് അലി, പോലീസ് അസി. കമ്മീഷണർമാരായ കെ. ലാൽജി, എം. എ നസീർ എന്നിവരും ഓട്ടോറിക്ഷ തൊഴിലാളികളെ പ്രതിനിധാനം ചെയ്ത് വിവിധ യൂണിയൻ പ്രതിനിധികൾ, യൂബർ പ്രതിനിധികളായ നിതിൻ കെ. നായർ, ആതിര കെ. മേനോൻ തുടങ്ങിയവരും പങ്കെടുത്തു.


uber-auto issue comes to an end.