യുഡിഎഫ് അധികാരത്തിൽ വന്നാൽ ലൈഫ് മിഷൻ പിരിച്ചുവിടും: മുന്നറിയിപ്പുമായി എം എം ഹസ്സൻ

‍തിരുവനന്തപുരം: നിയമസഭാ തെരഞ്ഞെടുപ്പിനു ശേഷം യുഡിഎഫ് അധികാരത്തിൽ വന്നാൽ സംസ്ഥാന സര്‍ക്കാര്‍ പദ്ധതികളായ ലൈഫ് മിഷൻ അടക്കമുള്ളവ അവസാനിപ്പിക്കുമെന്ന മുന്നറിയിപ്പുമായി യുഡിഎഫ് കൺവീനര്‍ എം എം ഹസൻ. ഭരണത്തിലെത്തിയാൽ ലൈഫ് മിഷൻ അടക്കമുള്ള സംവിധാനങ്ങള്‍ പിരിച്ചു വിടുമെന്നായിരുന്നു അദ്ദേഹത്തിൻ്റെ വാക്കുകള്‍.

ഭവനനിര്‍മാണ പദ്ധതികള്‍ അടക്കമുള്ളവ തദ്ദേശ സ്ഥാപനങ്ങളുടെ അധികാര പരിധിയിൽ വരുന്നതാണെന്നും നാലു പദ്ധതികളിലൂടെ സംസ്ഥാന സര്‍ക്കാര്‍ ഈ അധികാരങ്ങളിന്മേൽ കൈകടത്തുകയാണെന്ന് ഹസ്സൻ ആരോപിച്ചു. ഈ സംവിധാനങ്ങള്‍ പിരിച്ചു വിട്ട് തദ്ദേശ സ്ഥാപനങ്ങള്‍ക്ക് അധികാരം നല്‍കുന്ന രീതിയിൽ പദ്ധതികള്‍ നടപ്പാക്കുമെന്ന് എം എം ഹസ്സൻ വ്യക്തമാക്കി.

Also Read: കീമോ ചെയ്യുകയാണ്, സഹായി ഇല്ലാതെ പറ്റില്ല; ജാമ്യം തരണമെന്ന് ഇബ്രാഹിം കുഞ്ഞ്

അതേസമയം, സ്പീക്കര്‍ പി ശ്രീരാമകൃഷ്ണനെതിരെയുള്ള ആരോപണത്തിൽ വിശദമായ അന്വേഷണം വേണമെന്നും സ്പീക്കര്‍ നിരപരാധിയാണെന്ന് തെളിയേണ്ടത് അന്വേഷണത്തിലൂടെയാണെന്നും എം എം ഹസ്സൻ വ്യക്തമാക്കി. ശ്രീരാമൻ്റെയും കൃഷ്ണൻ്െയും പേരുള്ള സ്പീക്കര്‍ക്ക് ധാര്‍മികതയുടെ അംശം പോുമില്ലെന്നും ഹസ്സൻ ആരോപിച്ചു. മുഖ്യമന്ത്രി പിണറായി വിജയൻ അടക്കമുള്ള സിപിഎമ്മിൻ്റെ ഉന്നതനേതാക്കള്‍ തദ്ദേശ തെരഞ്ഞെടുപ്പ് പ്രചാരണത്തിൽ പങ്കെടുക്കാത്തത് പരാജയഭീതി മൂലമാണ്. മുഖ്യമന്ത്രിയ്ക്ക് പേടി കൊറോണയെ അല്ലെന്നും ജനങ്ങളെയാണെന്നും എം എം ഹസ്സൻ വ്യക്തമാക്കി. കാസര്‍കോട് സംസാരിക്കുമ്പോഴായിരുന്നു എം എം ഹസ്സൻ്റെ പരാമര്‍ശങ്ങള്‍.

Also Read: പഞ്ചായത്തിൽ പണി കിട്ടുന്നതാർക്ക്? ഇളകി മറിയുന്ന ജനം കൂട്ടത്തോടെ വോട്ടു ചെയ്യാനെത്തിയതിന് പിന്നിലെ കാരണം ഇതാണ്!!

നിലവിൽ എൻഫോഴ്സ്മെൻ്റ് അന്വേഷണം നേരിടുന്ന മുഖ്യമന്ത്രിയുടെ അഡീഷണൽ പ്രൈവറ്റ് സെക്രട്ടറി സിഎം രവീന്ദ്രൻ തെരഞ്ഞെടുപ്പ് കഴിയുന്നതു വരെ ചോദ്യം ചെയ്യലിനു ഹാജരാകില്ലെന്ന് ഹസ്സൻ പറഞ്ഞു. ഊരാളുങ്കൽ ലേബര്‍ സൊസൈറ്റിയ്ക്ക് കരാറുകള്‍ നൽകാൻ മുൻകൈയെടുത്തത് രവീന്ദ്രനാണെന്നും എം എം ഹസൻ വ്യക്തമാക്കി.