മാണി മുന്നണി വിട്ട ശേഷം യുഡിഎഫ് നിര്‍ണായക യോഗം ഇന്ന്

തിരുവനന്തപുരം: കേരള കോൺഗ്രസ് (എം) മുന്നണി വിട്ടതിനു ശേഷമുള്ള ആദ്യ യുഡിഎഫ് യോഗം ഇന്ന് ചേരും. കേരള കോണ്‍ഗ്രസ് മുന്നണി വിടാനുണ്ടായ സാഹചര്യം സംബന്ധിച്ച് ഘടകകക്ഷികള്‍ക്ക് വ്യത്യസ്തമായ അഭിപ്രായങ്ങളാണ് ഉള്ളത്. മാണിക്ക് രാഷ്ട്രീയ സംരക്ഷണം നല്‍കിയില്ലെന്ന വിമര്‍ശം മുസ്‍ലിം ലീഗ് യോഗത്തില്‍ ഉന്നയിച്ചേക്കും. മാണിയുമായി ഇനി ചര്‍ച്ചകള്‍ വേണമോ എന്ന കാര്യത്തില്‍ ഇന്നത്തെ യുഡിഎഫ് യോഗം അന്തിമ തീരുമാനമെടുക്കും. കെ എം മാണിയെ എന്നന്നത്തേക്കുമായി യുഡിഎഫില്‍ നിന്ന് അകറ്റേണ്ടെന്നാണ് ഘടകകക്ഷികളുടെ പൊതു നിലപാട്.

മാണിയുടെ പുറത്തുപോവല്‍ സംബന്ധിച്ച് കോണ്‍ഗ്രസ് നേതാക്കളുടെ പ്രതികരണങ്ങള്‍ക്കെതിരെ കേരളകോണ്‍ഗ്രസ് ജേക്കബ് വിഭാഗം ഉള്‍പ്പെടെ എതിര്‍പ്പ് ഉന്നയിക്കും എന്നും സൂചനകള്‍ ഉണ്ട്. തദ്ദേശ സ്വയംഭരണ സ്ഥാപനങ്ങളിലെ സഖ്യം തുടരുന്നത് സംബന്ധിച്ചും യുഡിഎഫ് യോഗം അന്തിമ തീരുമാനമെടുക്കും. പ്രതിപക്ഷനേതാവിന്‍റെ ഔദ്യോഗിക വസതിയായ കണ്ടോണ്‍മെന്‍റ് ഹൌസില്‍ വൈകിട്ട് 3 നാണ് യോഗം.