അവിശ്വാസത്തെ അനുകൂലിച്ചാല്‍ തിരിച്ചെടുക്കുന്ന കാര്യം ചര്‍ച്ച ചെയ്യും; അല്ലെങ്കിൽ 'പുറത്ത്', ജോസ് വിഭാഗത്തോട് UDF

കൊച്ചി: സർക്കാരിനെതിരായ അവിശ്വാസ പ്രമേയത്തെ അനൂകൂലിക്കണമെന്ന് ജോസ് കെ മാണി വിഭാഗത്തോട് യുഡിഎഫ്. പ്രമേയത്തെ അനുകൂലിച്ചില്ലെങ്കിൽ മുന്നണിയിൽ നിന്നും പുറത്താക്കുമെന്ന സൂചന യുഡിഎഫ് കൺവീനർ ബെന്നി ബെഹന്നാനാണ് നൽകിയത്. അച്ചടക്കലംഘനത്തിനുള്ള സസ്‌പെന്‍ഷനാണ് ഇപ്പോള്‍ കേരള കോണ്‍ഗ്രസിന് മേല്‍ ഏര്‍പ്പെടുത്തിയിരിക്കുന്നതെന്നും അദ്ദേഹം പറഞ്ഞതായി മാതൃഭൂമിയാണ് റിപ്പോർട്ട് ചെയ്തത്.

'അച്ചടക്കലംഘനത്തിനുള്ള സസ്‌പെന്‍ഷനാണ് ഇപ്പോള്‍ കേരള കോണ്‍ഗ്രസിന് മേല്‍ ഏര്‍പ്പെടുത്തിയിരിക്കുന്നത്. ഇത് ആവര്‍ത്തിച്ചാല്‍ കടുത്ത നടപടിയുണ്ടാവും. അവിശ്വാസപ്രമേയത്തെ അനുകൂലിച്ചാല്‍ മുന്നണിയില്‍ തിരിച്ചെടുക്കുന്ന കാര്യം ചര്‍ച്ച ചെയ്യും' ബെന്നി ബെഹന്നാന്‍ പറഞ്ഞു. നേരത്തെ കോട്ടയം ജില്ലാ പഞ്ചായത്ത് പ്രസിഡന്‍റ് സ്ഥാനത്തെച്ചൊല്ലിയുള്ള തർക്കമാണ് ജോസ് വിഭാഗത്തെ യുഡിഎഫിൽ നിന്നും അകറ്റിയിരുന്നത്.

Also Read: ക്വാറൻ്റൈൻ ഇനി ആർക്കെല്ലാം? നിർദേശങ്ങൾ ഇങ്ങനെ; കൊവിഡ് പ്രോട്ടോകോളിൽ മാറ്റവുമായി സംസ്ഥാന സർക്കാർ

യുഡിഎഫ് എടുത്ത തീരുമാനം അംഗീകരിക്കാന്‍ ജോസ് കെമാണി വിഭാഗം തയ്യാറായില്ല. അതുകൊണ്ട് മുന്നണിയില്‍ തുടരാനുള്ള ധാര്‍മികത അവര്‍ക്കില്ലെന്ന് കണ്ടതിനെ തുടര്‍ന്നാണ് ജോസ് കെ മാണി വിഭാഗത്തെ മാറ്റിനിര്‍ത്തിയത്. സർക്കാരിനെതിരായ അവിശ്വാസപ്രമേയത്തെ നിസഹരിക്കാനാണ് തീരുമാനമെങ്കിൽ തുടർനടപടികൾ യുഡിഎഫ് ആലോചിക്കുമെന്നും ബെന്നി ബെഹനാൻ പറഞ്ഞു.

തെറ്റായ തീരുമാനം തിരുത്താന്‍ ഇനിയും അവസരമുണ്ട്. ഞങ്ങള്‍ അത് ബോധ്യപ്പെടുത്താന്‍ ശ്രമിക്കും. അവിശ്വാസപ്രമേയത്തെ അനുകൂലിച്ച് വോട്ട് ചെയ്താല്‍ അവരെ തിരിച്ചെടുക്കുന്ന കാര്യം അപ്പോള്‍ ചര്‍ച്ച ചെയ്യാം. യുഡിഎഫ് എടുത്ത തീരുമാനത്തെ ലംഘിക്കുന്നത് ഗുരുതരമായ അച്ചടക്ക ലംഘനമാണെന്നും കൺവീനർ പറഞ്ഞു.

Also Read: തിരുവോണം ബംപർ: കൊവിഡ് കാലത്ത് കോടിപതിയാകാം; നറുക്കെടുപ്പ് തീയതിയും സമ്മാനങ്ങളും അറിയാം

നാളെ രാജ്യസഭ തെരഞ്ഞെടുപ്പിനായി നിയമസഭ സമ്മേളിക്കുന്നുണ്ട്. സർക്കാറിനെതിരെയുള്ള അവിശ്വാസ പ്രമേയം ചർച്ച ചെയ്യുന്ന സാഹചര്യത്തിൽ ജോസ് കെ മാണി പക്ഷവും ജോസഫ് വിഭാഗവും പാർട്ടിയിലെ അഞ്ച് എംഎൽഎമാർക്കും വിപ്പ് നൽകിയിട്ടുണ്ട്. നിലവിൽ ജോസ് കെ മാണിയ്‌ക്കൊപ്പം രണ്ട് എംഎൽഎമാരും ജോസഫ് പക്ഷത്ത് നിന്ന് പിജെ ജോസഫ് അടക്കം മൂന്ന് എംഎൽഎമാരുമാണുള്ളത്.

ജോസ് കെ മാണി പക്ഷത്തിന്റെ റോഷി അഗസ്റ്റിനാണ് പാർട്ടിയുടെ വിപ്പായി നിയമസഭാ രേഖകളിലുള്ളത്. എന്നാൽ, പാർട്ടിയുടെ വർക്കിംഗ് ചെയർമാൻ പിജെ ജോസഫ് കഴിഞ്ഞ ദിവസം തങ്ങളുടെ പാർട്ടിയുടെ വിപ്പ് മോൻസ് ജോസഫാണെന്ന് വ്യക്തമാക്കിയിരുന്നു.