'കേരളം വലിയ വില കൊടുക്കുന്നു'; കൊവിഡ് പ്രതിരോധത്തിൽ വീഴ്ചയുണ്ടായെന്ന് കേന്ദ്ര ആരോഗ്യമന്ത്രി

ന്യൂഡൽഹി: കൊവിഡ് 19 പ്രതിരോധത്തിൽ കേരളത്തിന് വീഴ്ച പറ്റിയെന്ന വിമര്‍ശനവുമയി കേന്ദ്ര ആരോഗ്യമന്ത്രി ഡോ. ഹര്‍ഷ് വര്‍ധൻ. പ്രതിവാര സോഷ്യൽ മീഡിയ പരിപാടിയായ സൺഡേ സംവാദിനു മുന്നോടിയായ യൂട്യൂബിലൂടെ പുറത്തു വിട്ട ടീസറിലാണ് കേരളത്തെ വിമര്‍ശിക്കുന്ന ഭാഗങ്ങളും ഉള്‍പ്പെടുത്തിയിട്ടുള്ളത്.

"ഗുരുതരമായ അലംഭാവത്തിന് കേരളം വലിയ വില കൊടുത്തു" എന്നാണ് വീഡിയോയുടെ ടീസറിൽ ആരോഗ്യമന്ത്രി നടത്തുന്ന പരാമര്‍ശം. ആദ്യഘട്ടത്തിൽ വൈറസിനെതിരെ കേരളത്തിൽ മികച്ച പ്രതിരോധം തീര്‍ത്തിരുന്നതായും വീഡിയോയിൽ സൂചിപ്പിച്ചിട്ടുണ്ട്. എന്നാൽ സൺഡേ സംവാദ് പരിപാടിയുടെ ആറാം എപിസോഡിനു മുന്നോടിയായി പുറത്തിറക്കിയ ടീസറിൽ കേരളത്തെപ്പറ്റിയുള്ള വിമര്‍ശനത്തിൻ്റെ മറ്റു പരാമര്‍ശങ്ങളില്ല.

Also Read: കൊവിഡ്: മോദി പരാജയമെന്ന് 'പാക് വേദി'യിൽ തരൂര്‍; ഇന്ത്യയെ അപമാനിക്കുന്നെന്ന് ബിജെപി

രാജ്യത്ത് ആദ്യമായി കൊവിഡ് 19 സ്ഥിരീകരിച്ചത് കേരളത്തിലായിരുന്നെങ്കിലും ആദ്യഘട്ടത്തിൽ വൈറസിൻ്റെ സമ്പര്‍ക്കവ്യാപനം പൂര്‍ണമായി തടയാൻ ആരോഗ്യവകുപ്പിന് കഴിഞ്ഞിരുന്നു. തുടര്‍ന്ന് ഇന്ത്യയിലെ മറ്റു പ്രദേശങ്ങളിലും ഗള്‍ഫ് മേഖലയിലും വൈറസ് വ്യാപനം വര്‍ധിച്ചതോടെ കേരളത്തിൽ വീണ്ടും കൊവിഡ് 19 റിപ്പോര്‍ട്ട് ചെയ്യുകയായിരുന്നു. ഒരു ഘട്ടത്തിൽ ചികിത്സയിലുള്ള രോഗികളുടെ എണ്ണം നാമമാത്രമായി കുറഞ്ഞെങ്കിലും കേന്ദ്രസര്‍ക്കാര്‍ അന്തര്‍സംസ്ഥാന യാത്രാനുമതി അടക്കം നിരവധി ഇളവുകള്‍ നല്‍കിയതോടെ രോഗികളുടെ എണ്ണം വീണ്ടും ഉയരുകയായിരുന്നു. എന്നാൽ രാജ്യത്ത് ഏറ്റവും തീവ്രരോഗവ്യാപനമുള്ള സംസ്ഥാനങ്ങളിലൊന്നാണ് കേരളമെങ്കിലും അതിനനുസരിച്ചുള്ള പരിശോധനകള്‍ നടക്കുന്നില്ലെന്നാണ് വിമര്‍ശനം. ഇതിനിടയിലാണ് കേന്ദ്ര ആരോഗ്യമന്ത്രിയുടെ പരാമര്‍ശം.

Also Read: 'വാക്സിനേഷൻ തെരഞ്ഞെടുപ്പ് പോലെ'; ആദ്യ 30 കോടി പേരെ കണ്ടെത്താൻ സർക്കാർ; അറിയേണ്ട 5 കാര്യങ്ങൾ

ശനിയാഴ്ച മാത്രം 7283 പേര്‍ക്ക് കൊവിഡ് 19 സ്ഥിരീകരിച്ചെങ്കിലും 51836 കൊവിഡ് പരിശോധനകള്‍ മാത്രമാണ് 24 മണിക്കൂറിൽ സംസ്ഥാനത്ത് നടത്തിയെതന്നാണ് ആരോഗ്യവകുപ്പിൻ്റെ കണക്ക്. രോഗവ്യാപനം ദേശീയ ശരാശരിയുടെ ഇരട്ടിയോളമാണെന്നും പത്ത് ലക്ഷം പേരിൽ നടത്തുന്ന കൊവിഡ് പരിശോധനകളുടെ എണ്ണത്തിൽ കേരളം ഡൽഹിയെയും പുതുച്ചേരിയെയും അപേക്ഷിച്ച് പിന്നിലാണെന്നും റിപ്പോര്‍ട്ടുകള്‍ വന്നിരുന്നു.

ലോകത്താദ്യമായി കൊവിഡ് 19 കേസ് റിപ്പോര്‍ട്ട് ചെയ്തത് ചൈനയിലാണെന്ന് കേന്ദ്ര ആരോഗ്യമന്ത്രി പറയുന്ന ഭാഗത്താണ് ടീസര്‍ ആരംഭിക്കുന്നത്. മൂക്കിലൂടെ നല്‍കുന്ന കൊവിഡ് 19 വാക്സിനുകളുടെ ഒരു ക്ലിനിക്കൽ പരീക്ഷണവും ഇന്ത്യയിൽ നടക്കുന്നില്ലെന്ന് മന്ത്രി അറിയിച്ചു. ഇന്ത്യയിൽ ഇതുവരെ കൊവിഡ് 19 വൈറസിന് ഒരു മ്യൂട്ടേഷനും സംഭവിച്ചിട്ടില്ലെന്നും മന്ത്രി "ഉറപ്പു നൽകി".