"യുവതികള്‍ എത്തിയത് അയ്യപ്പനെ കാണാനല്ല, ടിവിയിൽ കാണിക്കാൻ"

തിരുവനന്തപുരം: സുപ്രീം കോടതി വിധിയ്ക്ക് ശേഷം ശബരിമലയിലെത്തിയ യുവതികളെ രൂക്ഷമായി വിമര്‍ശിച്ച് കേന്ദ്രമന്ത്രി അൽഫോൺസ് കണ്ണന്താനം. ശബരിമലയിലെത്തിയ യുവതികളുടെ ഉദ്ദേശം അയ്യപ്പനെ കാണുക എന്നതല്ലായിരുന്നുവെന്നും പത്ത് മിനിട്ട് ടിവിയിൽ പ്രത്യക്ഷപ്പെടുക എന്നതായിരുന്നുവെന്നും കണ്ണന്താനം കുറ്റപ്പെടുത്തി.

ക്രമസമാധാനം തകര്‍ക്കുകയായിരുന്നു യുവതികളുടെ ലക്ഷ്യമെന്ന് കണ്ണന്താനം പറഞ്ഞു. പള്ളിയിൽ പോകാത്ത ഒരു മുസ്സീം സ്ത്രീ ശബരിമലയിൽ എന്താണ് തെളിയിക്കാൻ ശ്രമിച്ചതെന്ന് കണ്ണന്താനം ചോദിച്ചു. പള്ളിയിൽ പോകാത്ത മറ്റൊരു ക്രിസ്ത്യൻ സ്ത്രീയും മല കയറാനെത്തി. പത്ത് മിനിട്ട് ടെലിവിഷനിൽ തല കാണിക്കുക എന്നതായിരുന്നു അവരുടെ ഉദ്ദേശം. ഇതൊന്നും സ്വീകാര്യമല്ലെന്നും കേരളത്തിലെ ജനങ്ങള്‍ക്ക് അയ്യപ്പനോടുള്ള പ്രത്യേക സ്നേഹത്തെ നമ്മള്‍ ബഹുമാനിക്കണമെന്നും അദ്ദേഹം കൂട്ടിച്ചേര്‍ത്തു.

അമിത് ഷായുടെ ശരീരത്തെപ്പറ്റിയുള്ള മുഖ്യമന്ത്രി പിണറായി വിജയന്‍റെ പരാമര്‍ശം അപകീര്‍ത്തിപരമാണെന്ന് കണ്ണന്താനം അഭിപ്രായപ്പെട്ടിരുന്നു. ജനവികാരം മാനിച്ചില്ലെങ്കിൽ ജനം സര്‍ക്കാരിനെ വലിച്ച് താഴെയിടുമെന്നാണ് അമിത് ഷാ പറഞ്ഞതെന്നും മുഖ്യമന്ത്രി യഥാര്‍ത്ഥ പ്രശ്നത്തിൽ നിന്ന് ശ്രദ്ധ തിരിക്കുകയാണെന്നും കണ്ണന്താനം ആരോപിച്ചു.