മാണി വേണോ? ബിജെപിയിൽ തര്‍ക്കം രൂക്ഷം

തിരുവനന്തപുരം: കേരള കോൺഗ്രസ് എമ്മുമായുള്ള സഹകരണം സംബന്ധിച്ച് ബിജെപിയിൽ തര്‍ക്കം. കെ എം മാണിയെ എൻഡിഎയിലേയ്ക്ക് സ്വാഗതം ചെയ്തുകൊണ്ടുള്ള ബിജെപി സംസ്ഥാന അധ്യക്ഷൻ കുമ്മനം രാജശേഖരന്‍റെ പ്രസ്താവനയാണ് പാര്‍ട്ടിയിൽ ഭിന്നതയ്ക്കിടയാക്കിയത്. എന്നാൽ തെരഞ്ഞെടുപ്പിൽ കള്ളന്മാരുടെയും കൊലപാതകികളുടെയും വോട്ടുതേടുന്നതിൽ തെറ്റില്ലെന്നു പറഞ്ഞ മുരളീധരൻ ഇന്ന് അഴിമതിക്കാരെ മുന്നണിയിലെടുക്കില്ലെന്ന് ഇന്ന് വ്യക്തമാക്കി. കെഎം മാണിയോടുള്ള നിലപാടിൽ മാറ്റമില്ലെന്നും അദ്ദേഹം പറഞ്ഞു

അതേസമയം, മുരളീധരനെ എതിര്‍ത്ത് ചെങ്ങന്നൂരിലെ ബിജെപി സ്ഥാനാര്‍ഥിയും മുതിര്‍ന്ന നേതാവുമായ പി എസ് ശ്രീധരൻ പിള്ള രംഗത്തുവന്നതോടെ വിഷയം പുതിയ തലത്തിലെത്തി. എൻഡിഎയിൽ ആര്‍ക്കും അയിത്തമില്ലെന്നും കെഎം മാണി കൊള്ളക്കാരനാണെന്ന അഭിപ്രായം തനിക്കില്ലെന്നുമായിരുന്നു ശ്രീധരൻ പിള്ളയുടെ അഭിപ്രായം. രാഷ്ട്രീയത്തിൽ തൊട്ടുകൂടായ്മ ഒരു കുറ്റമാണെന്നായിരുന്നു അദ്ദേഹത്തിന്‍റെ പ്രസ്താവന. ഇക്കാര്യത്തിൽ മുരളീധരന്‍റെ അഭിപ്രായം തനിക്കില്ലെന്നും രണ്ട് മുന്നണികളെയും വേണ്ടെന്നു കരുതിയാകണം കെഎം മാണി സ്വതന്ത്രനിലപാട് സ്വീകരിച്ചതെന്നും ശ്രീധരൻ പിള്ള പറഞ്ഞു.