മന്ത്രിമാരെ ഇനിയും തിരുത്തും: വി എം സുധീരൻ

തിരുവനന്തപുരം: അനുസരിക്കാത്ത മന്ത്രിമാരെ നിലയ്ക്ക് നിർത്താനറിയാമെന്നും മന്ത്രിമാരെ ഇനിയും തിരുത്തുമെന്നും കെപിസിസി പ്രസിഡന്‍റ് വി എം സുധീരൻ. സർക്കാരിനെ നേർവഴിക്ക് നയിക്കേണ്ട ബാധ്യത പാർട്ടിക്കുണ്ട്. പാർട്ടി പ്രതിച്ഛായ മെച്ചപ്പെടുത്തേണ്ടതുണ്ട്. കരുണ എസ്റ്റേറ്റ് വിഷയത്തിൽ ഭേദഗതിയല്ല, മറിച്ച് ഉത്തരവ് പിൻവലിക്കുകയാണ് വേണ്ടത്. രണ്ട് തവണ കത്ത് കൊടുത്തുവിട്ടിട്ടും ഉത്തരവ് പിൻവലിക്കില്ലെന്ന് റവന്യു മന്ത്രി പറഞ്ഞു. ഈ സാഹചര്യത്തിലാണ് താൻ പ്രതികരിച്ചതെന്നും കെപിസിസി നിർവാഹക സമിതിയോഗത്തിൽ സുധീരൻ പറഞ്ഞു.

ന്യായമായ കാര്യത്തിൽ പാർട്ടി സർക്കാരിനൊപ്പം നിൽക്കും. പക്ഷെ, ഒരു കൊള്ളയ്ക്കും കൂട്ടുനിൽക്കാൻ തനിക്കാവില്ലെന്ന് കെപിസിസി അധ്യക്ഷൻ ഇന്നലെ വ്യക്തമാക്കിയിരുന്നു. കരുണ എസ്റ്റേറ്റ് പ്രശ്‌നത്തിൽ എജിയുടെ നിയമോപദേശം തേടേണ്ടതില്ലെന്നും സുധീരൻ വ്യക്തമാക്കിയിരുന്നു. എന്നാൽ ഉത്തരവ് പിൻവലിക്കില്ലെന്നും ഭേദഗതികളോടെ നടപ്പാക്കുമെന്നും ഇന്ന് ചേർന്ന മന്ത്രിസഭായോഗം തീരുമാനിച്ചിരുന്നു.