'പിണറായിയുടെ എതിർപ്പ് കരിഞ്ചന്തക്കാരെ സഹായിക്കാൻ'

തിരുവനന്തപുരം: സ്കൂൾ ഭക്ഷണത്തിനു ആധാർ നിർബന്ധമാക്കിയുള്ള കേന്ദ്രസർക്കാർ തീരുമാനത്തെ മുഖ്യമന്ത്രി പിണറായി വിജയൻ എതിർത്തതിനെതിരെ ബി ജെ പി നേതാവ് വി മുരളീധരൻ. മുഖ്യമന്ത്രിയുടെ നടപടി കരിഞ്ചന്തക്കാരെയും പൂഴ്ത്തിവെപ്പുകാരെയും സഹായിക്കാനാണെന്നും അദ്ദേഹം ആരോപിച്ചു.

സംസ്ഥാനത്തെ സർക്കാർ സ്കൂളുകളിൽ ഓരോ വർഷവും വിദ്യാർത്ഥികളുടെ എണ്ണത്തിൽ വലിയ കുറവാണ് സംഭവിക്കുന്നത്. എന്നാൽ മിക്ക സ്കൂളുകളും നിലനില്ക്കുന്നത് വിദ്യാർത്ഥികളുടെ എണ്ണം പെരുപ്പിച്ചു കാട്ടിയാണ്. ഇങ്ങനെയുള്ള കൃത്രിമകണക്കുകൾ സമർപ്പിച്ച് കേന്ദ്രത്തിൽ നിന്നും അർഹതയിൽ കൂടുതൽ ഭക്ഷ്യധാന്യങ്ങളാണ് സംസ്ഥാനസർക്കാരുകൾ തട്ടിയെടുക്കുന്നതെന്നും മുരളീധരൻ ആരോപിച്ചു.

ഇങ്ങനെ അനർഹമായി നേടിയെടുക്കുന്ന അധികധാന്യങ്ങൾ കരിഞ്ചന്തയിൽ വിറ്റ് കോടികളുടെ ലാഭം കൊയ്യുന്നവരുണ്ട്. ഇത്തരം മാഫിയയെ സംരക്ഷിക്കാനാണ് മുഖ്യമന്ത്രി ശ്രമിക്കുന്നത്. ജനങ്ങളുടെ നന്മ മുൻനിർത്തി കേന്ദ്രസർക്കാരിൻ്റെ നീക്കത്തെ പിണറായി വിജയൻ സ്വീകരിക്കുകയാണ് ചെയ്യേണ്ടതെന്നും പ്രസ്താവനയിൽ മുരളീധരൻ ആവശ്യപ്പെട്ടു.

V Muraleedharan against Pinarayi Vijayan

CM Pinarayi Vijayan opposing Centre to help black-marketers, says V Muraleedharan