സ്വാശ്രയം: സര്‍ക്കാരിനെ വിമര്‍ശിച്ചിട്ടില്ലെന്ന് വി.എസ്

തിരുവനന്തപുരം: സ്വാശ്രയ പ്രശ്‌നത്തില്‍ സര്‍ക്കാരിനെ വിമര്‍ശിച്ചിട്ടില്ലെന്ന് വി.എസ്. എസ്.ബി.ടി-എസ്.ബി.ഐ ലയനസമരത്തെ കുറിച്ചാണ് താന്‍ പറഞ്ഞത്. ബാങ്കുകളിലെ താത്കാലിക ജീവനക്കാരെ പിരിച്ചുവിടുന്നത് തെറ്റാണെന്നാണ് താന്‍ ഉദ്ദേശിച്ചത്. മാധ്യമ പ്രവര്‍ത്തകര്‍ അത് വളച്ചൊടിച്ചെന്നും വി.എസ് പറഞ്ഞു.

സ്വാശ്രയ സമരത്തോട് സര്‍ക്കാര്‍ സ്വീകരിക്കുന്ന സമീപനത്തെ കുറിച്ച് മാധ്യമ പ്രവര്‍ത്തകരുടെ ചോദ്യത്തോട് 'തെറ്റാണ്, സമരം ഒത്തുതീര്‍പ്പാക്കണം' എന്നായിരുന്നു വിഎസ് രാവിലെ പ്രതികരിച്ചിരുന്നത്. വിഎസിന്റെ പ്രതികരണം വന്നതിന് പിന്നാലെ പ്രതിപക്ഷം അത് ഏറ്റെടുത്തു. വിവാദമായതോടെ മന്ത്രി ഇപി ജയരാജനും ഡിഐഎഫ്‌ഐ അഖിലേന്ത്യാ പ്രസിഡന്റ് എംബി രാജേഷനും വിഎസിന്റെ നിലപാടിനെ പരസ്യമായി തള്ളിപ്പറഞ്ഞു. സ്വാശ്രയ ഫീസ് വര്‍ധനക്കെതിരെ നിയമസഭാ കവാടത്തില്‍ യു.ഡി.എഫ് എം.എല്‍.എമാര്‍ നടത്തുന്ന അനിശ്ചിതകാല നിരാഹാര സമരം അഞ്ചാം ദിവസത്തിലേക്ക് കടന്നിരിക്കെയാണ് വിഎസിന്റെ പ്രതികരണം. സ്വാശ്രയ വിഷയത്തില്‍ കാര്യങ്ങള്‍ മനസ്സിലാകുന്ന ഒരു നേതാവും ഇങ്ങനെ പറയില്ലെന്നായിരുന്നു ഇ.പി ജയരാജന്‍ പറഞ്ഞിരുന്നത്. മാനേജ്‌മെന്റിന്റെ കൊള്ളയ്ക്ക് കൂട്ടുനില്‍ക്കുന്ന സമരമാണ് നടക്കുന്നതെന്നും സര്‍ക്കാര്‍ സ്വീകരിച്ചത് ശരിയായ നിലപാടാണെന്നും ഇ.പി പറഞ്ഞിരുന്നു.