വരാപ്പുഴ: ആത്മഹത്യാ പ്രേരണകുറ്റം തള്ളി പോലീസ്

കൊച്ചി: വരാപ്പുഴയിൽ വീട് ആക്രമിച്ചതിനെ തുടർന്ന് ഗൃഹനാഥൻ ആത്മഹത്യ ചെയ്ത കേസ് നിലനിൽക്കില്ലെന്ന് പോലീസ്. തെളിവില്ലെന്ന് ചൂണ്ടിക്കാട്ടി കേസ് റദ്ദാക്കിയെന്ന് പോലീസ് കോടതിയിൽ റിപ്പോർട്ട് നൽകി. പോലീസ് കസ്റ്റഡിയിൽ മരിച്ച ശ്രീജിത്ത് ഉൾപ്പടെയുള്ളവർ വീട് കയറി ആക്രമിച്ചതിനെ തുടർന്ന് വാസുദേവൻ ആത്മഹത്യാ ചെയ്‌തെന്നായിരുന്നു കേസ്. എന്നാൽ ഇത് തെളിയിക്കാനാകില്ലെന്ന് നോർത്ത് പറവൂർ പോലീസ് കോടതിയിൽ റിപ്പോർട്ട് നൽകി.

ശ്രീജിത്ത് ഉൾപ്പടെ അറസ്റ്റിലായ പ്രതികൾക്ക് ആക്രമത്തിൽ പങ്കില്ലെന്ന് പോലീസ് സമ്മതിച്ചു. റൂറൽ ടൈഗർ ഫോഴ്‌സ് കസ്റ്റഡിയിലെടുത്ത ഒമ്പതിൽ ഏഴു പേർ കേസിലെ പ്രതികളല്ല.വീട് ആക്രമിച്ച കേസ് നിലനിൽക്കും. എന്നാൽ ആത്മഹത്യാ പ്രേരണകുറ്റം നിലനിൽക്കില്ല. ഇതുമായി ബന്ധപ്പെട്ട് കസ്റ്റഡിയിലിരിക്കെയാണ് ശ്രീജിത്ത് കൊല്ലപ്പെട്ടത്. അതിനിടെ ശ്രീജിത്ത് കൊല്ലപ്പെട്ട കേസിൽ അറസ്റ്റിലായ മൂന്ന് പോലീസുകാരുടെ ജാമ്യാപേക്ഷ പറവൂർ കോടതി തള്ളി.