വരാപ്പുഴ കസ്റ്റഡി മരണം: എസ്.ഐ ദീപക്കിനെതിര കൊലക്കുറ്റം ചുമത്തി

വരാപ്പുഴ: ശ്രീജിത്തിന്‍റെ കസ്റ്റഡി മരണത്തില്‍ എസ്‌ഐ ജിഎസ് ദീപക്കിനെ കൊലക്കുറ്റം ചുമത്തി അറസ്റ്റ് ചെയ്തു. ദീപക്കിനെ നാലാം പ്രതിയായാണ് പ്രതിപ്പട്ടികയില്‍ ചേര്‍ത്തത്. കഴിഞ്ഞ ഒന്‍പത് മണിക്കൂറിലധികമായി ദീപക്കിനെ ആലുവ പോലീസ് ക്ലബ്ബില്‍ ചോദ്യം ചെയ്ത് വരികയായിരുന്നു.

ഐ.ജി എസ്. ശ്രീജിത്ത് അടക്കമുള്ള ഉന്നതോദ്യോഗസ്ഥരാണ് ദീപക്കിനെ ചോദ്യം ചെയ്തത്. ശ്രീജിത്തിനെ എസ്.ഐ ദീപക്ക് മര്‍ദ്ദിക്കുന്നത് കണ്ടുവെന്ന മറ്റ് പ്രതികളുടെ മൊഴി ഏറെ നിര്‍ണ്ണായകമായി. ഇതോടെ കേസില്‍ അറസ്റ്റിലായവരുടെ എണ്ണം നാലായി. എഎസ്‌ഐ അടക്കമുളളവരെ അറസ്റ്റ് ചെയ്തില്ലെങ്കില്‍ ശക്തമായ സമരവുമായി മുന്നോട്ട് പോകുമെന്ന് ശ്രീജിത്തിന്‍റെ കുടുംബം വ്യക്തമാക്കിയതിന് പിന്നാലെയാണ് അറസ്റ്റ്.

സംഭവത്തില്‍ സിഐ ക്രിസ്പിന്‍ സാംസ എസ്‌ഐ ദീപക്, എഎസ്‌ഐ സുധീര്‍, സിപിഒ സന്തോഷ് എന്നിവരെ നേരത്തെ സസ്പെന്‍ഡ് ചെയ്തിരുന്നു.